பரவாயில்லையே இளங்கோவன்!

நடிகர் கமல்ஹாசன் தனது பிறந்தநாள் விழாவை முன்னிட்டு கூறிய கருத்துக்களின் அடிப்படையில் பா.ஜ.க.வின் தேசிய செயலாளர் எச். ராஜா வாரஇதழ் ஒன்றில் கடிதம் எழுதுவதாகக் கூறி அவர்மீது சேற்றை வாறி இறைத்திருக்கிறார். தனிப்பட்ட முறையில் அவர்மீது இவருக்கு இருக்கும் காழ்ப்புணர்ச்சியை கொட்டித் தீர்த்திருக்கிறார். சமீபகாலமாக பா.ஜ.க.வினருக்கு சகிப்புத்தன்மை இல்லாமல் செயல்பட்டு வருவதால் நாடு முழுவதும் எதிர்ப்பு அலைகள் கடுமையாக எழுந்து வருகின்றன. மாற்றுக் கருத்து கொண்டவர்கள் கொல்லப்படுவது, அச்சுறுத்தப்படுவது, மிரட்டப்படுவது தொடர்கதையாக நடந்து வருகிறது.

எச். ராஜா எழுதிய கடிதத்தில் 'கமல்ஹாசன் என்ற சொல், தமிழ்ச் சொல்லா ? சுத்த சமஸ்கிருத சொல் தானே ? நல்ல தமிழ்ப் பெயரை மாற்றி வைத்துக் கொள்ள வேண்டும்" என்று அறிவுரை கூறுவதற்கு இவருக்கு என்ன தகுதி இருக்கிறது ? நாட்டு மக்கள் மீது சமஸ்கிருதத்தை திணிப்பதற்கு பல வகைகளில் பகீரத முயற்சிகளை எடுத்து வருகிற சங்பரிவாரங்கள் இதுகுறித்து பேசலாமா ? மேலும் 'என் தட்டில் என்ன உணவு உண்ண வேண்டும் என்பதை நான்தான் முடிவு செய்ய வேண்டும்" என்று கமல்ஹாசன் கூறியதிலே என்ன தவறு ? பசுவதை தடைச் சட்டம் பல மாநிலங்களில் இருப்பதாகக் கூறுகிற எச். ராஜா, மேலும் இது அரசமைப்பு விதி 48 இல் இருப்பதாக கூறி தமது வாதத்திற்கு வலு சேர்த்திருக்கிறார். பசுவை புனிதமாகக் கருதுகிற வகையில் அப்பிரிவு இல்லை என்பதை ஒருமுறைக்கு பலமுறை அதை படித்து தெளிவு பெறுவது நல்லது. பசுவை 10 அல்லது 15 ஆண்டுகள் கழித்து எதற்கும் பயன்படாத நிலையில் அதை கொல்வதற்கு அரசு அனுமதிப்பதையும் அச்சட்டத்தில் கூறப்பட்டிருப்பதை ராஜாவால் மறுக்க முடியுமா ? 

2014 இல் இருந்த இறைச்சி ஏற்றுமதியைவிட 2015 இல் 14 சதவீதம் அதிகமாக ரூ.29,000 கோடி ஏற்றுமதி செய்வது குறித்து ராஜா அறிவாரா ? இந்த இறைச்சி ஏற்றுமதியை அதிகமாக செய்வதே பா.ஜ.க.வை சேர்ந்தவர்கள் என்பது ராஜாவுக்கு தெரியுமா ? மாட்டிறைச்சி ஏற்றுமதியை அனுமதிக்கிற பா.ஜ.க., இதைத்தான் உண்ண வேண்டும், இதை உண்ணக் கூடாது என்று சொல்வதற்கு என்ன உரிமை இருக்கிறது ? 

விடுதலைப் போராட்ட தியாகி பரமக்குடி சீனிவாசனின் மகனாக பிறந்து, 6 வயதில் களத்தூர் கண்ணம்மா படத்தில் குழந்தை நட்சத்திரமாக அறிமுகமாகி 200 படங்களுக்கு மேல் நடித்து, உலக சாதனை படைத்து தமிழர்களுக்கெல்லாம் தமிழராக வாழ்ந்து கொண்டிருக்கிற கமல்ஹாசன் அவர்களை பாராட்டுவதற்கு மனமில்லாவிட்டாலும் குறைந்தபட்சம் கொச்சைப்படுத்தாமல் இருக்கலாமே ? 

தமிழ், தெலுங்கு, மலையாளம், கன்னடம், ஹிந்தி என மொழி எல்லைகளைக் கடந்து திரைப்படங்களில் நடித்து தமிழர்களின் பாராட்டை மட்டுமல்ல, உலக மக்களின் பாராட்டையும் பெற்றவர் கமல்ஹாசன். 4 முறை தேசிய விருதும், 19 முறை பிலிம்பேர் விருதும், பத்மஸ்ரீ, பத்மபூஷன் என பல பட்டங்களை, பரிசுகளை குவித்த தமிழ்த்தாயின் மூத்த கலைமகன் கமல்ஹாசன் மீது குறிவைத்து தாக்குகிற பா.ஜ.க.வினரின் உள்நோக்கத்தை அனைவரும் அறிந்து வைத்திருக்கிறார்கள். கமல்ஹாசன் தமிழ் மண்ணில் பிறந்தது தமிழருக்கு பெருமை! இந்தியருக்கு பெருமை !

கடந்த ஓரிரு ஆண்டுகளாக பா.ஜ.க.வினர் வாய்த்துடிப்போடு பேசி வருவதை நாடு முழுவதும் கண்டு வருகிறோம். அந்த வகையில் தந்தை பெரியாரை மிகமிக கேவலமாக இழிவுபடுத்தி பேசிவிட்டு, 'வைகோ வீடு போய்ச் சேர மாட்டார்" என்று மிரட்டல் விடுத்த எச். ராஜாவுக்கு ஒன்றை தெளிவுபடுத்த விரும்புகிறோம். ஆதிக்க சக்திகளால் புறக்கணிக்கப்பட்ட தமிழ்ச் சமுதாயத்தினருக்கு சமநிலையும், சமவாய்ப்பும் தமது வாழ்க்கையை அர்பணித்து பெற்றுத்தந்தை பெரியாரை இழிவுபடுத்தி விட்டு தமிழ் மண்ணில் உங்களை நடமாட அனுமதித்தற்காக தமிழ்ச் சமுதாயத்தின் சகிப்புத்தன்மைக்கு நீங்கள் நன்றி சொல்ல வேண்டும். 

எச். ராஜா எழுதிய கடிதத்தின் இறுதியில் 'எளியாரை வலியார் அடித்தால் வலியாரை தெய்வம் அடிக்கும்" என்று முடித்திருக்கிறார். எளியாராகவோ, வலியாராகவோ இல்லாமல் விபத்தின் காரணமாக அரசியலில் வலம் வந்து கொண்டிருக்கிற எச். ராஜா போன்ற அராஜகவாதிகளை காலம் வரும்போது தமிழ் மக்கள் குப்பைக் கூடையில் தூக்கி எறிவார்கள் என்பது உறுதி.

தந்தை பெரியாரில் தொடங்கி,  கமல்ஹாசன் வரை நீண்டிருக்கிற உங்களது வாய்த்துடுக்கான, தரம் தாழ்ந்த, இழிவான பேச்சுக்களை இனியாவது நீங்கள் நிறுத்திக் கொள்ள வேண்டும். அப்படி நிறுத்தவில்லையென்றால் அதனுடைய விளைவுகளை நீங்கள் சந்திக்க வேண்டி வரும்.’’

விஷால் அணி நாசர் வெற்றி பெறட்டும்!

• அரசியலும்,திரைப்படங்களும் தமிழர்களின் வாழ்வியலின் முக்கிய பகுதியாக கலைஞர் கருணாநிதியின் வசனம்,சிவாஜியின் நடிப்பில் பராசக்தி முதல் தொடர்கிறது எனலாம்.சங்கிலி முருகன் யாரென்றும், அவர் வழக்கு தொடர்ந்து காலம் தொட்டு சுமார் 5 வருடங்களுக்கும் மேலாகியும்,குமரிமுத்து,எஸ்.வி.சேகர் போன்றவர்களை வெளியேற்றிய கால கட்டங்களில் புகைய துவங்கி இன்று கோபக்கனல்கள்,எதிர் மறுப்பு என பொது வெளிக்கு  வந்து விட்டதால் கருத்துரிமை பங்காளியாகிறேன்.

சரத்குமார் அணியில் ஓரளவுக்கு தன்மையாக,மென்மையாக பேசும் குரல் சரத்குமாருக்கு மட்டுமே இருக்கிறது.ஆனாலும் அரசியல சாவகாசம்,பொதுப் பிரச்சினைகளை கையாண்ட அனுபவங்களால் கட்டப்பஞ்சாயத்து அரசியல் தொனியில் குற்றங்களை தொடுகிறார்.வாதங்களை வைக்கிறார். 

திரைப்படத்துறையினருக்கு கிடைக்கும் பயணங்கள்,மனித உறவுகளின் உளவியலை நடிப்பு,கதை,வசனம்,முகபாவங்கள் என பல வடிவத்தில் கொண்டு வரும் வாய்ப்பு பெற்றவர்கள்.இதுவே அனுபவங்களாகவும் ,தமிழகத்தின் வாழ்வியலை உணரும் அதிக வாய்ப்புகளும், வரங்களும் பெற்றவர்கள். ஆனாலும் ராதாரவி,சிம்பு,ராதிகா என அனைவரும் ஞான சூன்யங்களாக இருக்கிறார்கள்.

 நண்பர்களிடம் கெட்ட வார்த்தை பேசுவதற்கும்,மைக்கை கையில் ஏந்திக்கொண்டு திட்டுவதற்கும் வித்தியாசங்கள் இருக்கின்றன.என்ன வருண் காதில் விழுகிறதா:) பதவிக்கு ஆசை என்பதை விட 29 வருடம் 11 மாதம் குத்தகைக்கு விட்டதில் குளறுபடிகள் இருக்கின்றன என்பதை சங்கிலி முருகன் பேச்ச்சிலும்,சரத்குமாரின் மறுப்பு அறிக்கையிலும் உணர முடிகிறது.

ரஜனி,கமல்,சூர்யா,விஜய்,அஜித் போன்றவர்கள் பேசாமல் இருப்பதில் அர்த்தம் இருக்கிறது.அவர்கள் அமைதியாக இருப்பதை ஆதரிக்கிறேன். 

 சின்னப்பையனிலிருந்து நடிக்கிறேன் என்று ஒருமையில் விஷாலை திட்டி சிம்பு கத்துவதற்கும்,கமலின் சின்ன வயது முதல் நடிப்பிற்கும்  வீணாப்போன சென்னை ஆற்றுக்கும்,,இமயமலை அடிவார அருவிக்குமான வித்தியாசங்கள் உள்ளது.

இரண்டு அணிகளின் மேடைகளின் பக்கவாத்தியமாக நிற்பவர்களின் முகபாவங்களிலேயே தெரிகிறது பஞ்ச பாண்டவர் குழுவின் வெற்றிக்கான அறிகுறியும்,சோர்ந்து போன முகங்களாய் சரத்குமார் அணியும். 

சரத்குமார் அணிக்கு தோல்வி நிச்சயம் என்ற போதிலும் பின்வாங்காது ஜனநாயக தேர்தலுக்கான அடிக்கல்லை அடுத்த தலைமுறைக்கு விட்டு செல்லட்டும்.ராதாரவி திரைப்படக்குழுவினர்க்கு ஆற்றிய பணிகள்,சரத்குமார் வங்கியில் பேசி கடனை குறைத்த நல்ல காரியங்கள் ஒரு தராசிலும்,கெட்ட வார்த்தைகள்,ஈகோ போன்றவை மறு தராசிலும் ஒப்பிட்டாலும் பெரும் தவறாக 30 வருட குத்தகை மாபெரும் தவறு. 

எட்டாத,கிட்டாத தூரத்தில் நான் வனவாசம் செய்வதால் திட்டக்குழுவினரான சண்டைக்கோழிகளான சரத்குமார் அணி மைக்கை பிடிக்காமல் மனதுக்குள்ளே என்னை திட்டுமாறு வேண்டுகிறேன்.

முடிக்கிறதுக்கு முன்னாடி சத்யராஜ் கடைசி ரயிலை பிடித்து வந்ததற்கு பாராட்டுகள். சிவக்குமார்,பாக்கியராஜ், பிரகாஷ் ராஜ், போன்றவர்களிடம் பெரும் மெச்சூரிட்டி வெளிப்படுகிறது.

லங்காபதியே! என்னை அசத்தாத முகமூடியே!

ஒரு முறையாவது அனானி முகமூடி அணிந்து பார்க்க வேண்டுமென்ற ஆசையை முந்தா நாள் ஒரு பாய் "ஒசூர் பாய் முகமூடியே நீதானய்யான்னு" புது கொலம்பஸ் கண்டுபிடிப்பாய் யுரேக்கா என கத்தி விட்டார்:)

ஆசை,தோசை,பின்னூட்ட வடை! இப்படியெல்லாம் சொன்னால் இது பதிவுலக முகமூடியென்றோ,அனானி பின்னூட்டம் பற்றியென்றோ யாராவது நினைத்தால் அடுத்த வருட ஏப்ரம் 1 ம் தேதி இப்பவே தமிழ் புத்தாண்டு எப்பங்கிற மாதிரி இப்பவே கொண்டாடி வேண்டியதுதான்..இன்றைக்கு அதிகமா வியாபரம் ஆவது இந்த  முகமூடிதான்.நம்ம பதிவுலக நண்பர்கள் போட்டுக்கிற முகமூடியெல்லாம் ஏதோ திருவிழாவுக்கு போற குழந்தைக்கு கண்ணாடி வாங்கிப் போட்ட மாதிரியும் ஜவ்வு மிட்டாய் கடிகாரம் கட்டின மாதிரியான முகமூடிகள் இவை.

 எந்திரனுக்கு மாற்று சிம்கார்டு போட்டு விட்ட மாதிரி வெளியே பார்த்தால் அரசியல்,வெளியுறவுக்கொள்கை.உள்ளே பார்த்தால் ரகசிய ஒப்பந்தம், சுவற்றுக்குள் பேச்சு வார்த்தை.ஊடகத்துக்கு ஒன்ரை சொல்.இன்னொன்றை செயல்படுத்துன்னு அரசியல் முகமூடி உத்தம புத்திரனில் சிவாஜி சிவாஜிக்கு மாட்டிவிட்ட முகமூடி மாதிரி அரசியல் ஆசனத்து இரட்டை வேடங்கள்.

வெளுத்ததெல்லாம் பால் அல்ல,வெள்ளை உடுத்தியவரெல்லாம் காந்தியின் பேரனுமல்ல.தமிழகத்திற்கு மஞ்சள்தான் மங்களம்.அது அமங்களமாகிப் போய் ஆண்டுகள் பலவாகி விட்டன..பழகிய தோசத்துக்காக இன்னும் மஞ்சள் பையிலும்,திருமண அழைப்பிதழலின் மூலையிலும் ஒட்டிக்கொண்டிருக்கின்றன.

கறுப்பு நிறம் அழுகிறதா என்று இருட்டுக்குள் இருட்டாக....பார்க்கவே முடியவில்லை சிரிப்பு சத்தம் கேட்காவிட்டாலும் அவ்வப்போது விசும்பல் மட்டுமே கேட்கின்றது.

சிவப்பு?அது ஏதோ தொழிலாளர் குரலாக இங்குமங்கும் ஒலிக்கிறது.ராஜா மாதிரி இருக்க வேண்டியது.ரஷ்யாவுல கேட்டாங்க,சீனாவுல கேட்டாங்க,கியூபாவுல கேட்டாங்கன்னு சுக்கிர திசை அடிக்காத செவ்வாய் தோசமாம்.குடுகுடுப்பை ஜோஸ்யக்காரன்  ராவுல வந்து உடுக்கை அடிச்சுட்டுட்டார்.

சிவப்பும் கறுப்பும் கலந்த மாதிரி ராஜ பார்வையிருந்தாலும் காலை நேரத்தில் சிவப்பாவேன்,சூரியன் மறைந்தால் கறுப்புதான் எனக்கு புடிச்ச கலர் மாதிரி இரட்டை மன கலர்

காவி!பிரம்மச்சரியத்தின் அடையாளம் என்பதை புரட்டிப் போட்டு ரத்தம் பூசிக்கொண்டும் நீண்ட நாட்களாகின்றன.

இந்திய அரசியல் வர்ணங்களே வேண்டாமென விட்டாலாச்சார்யா குகை மந்திரவாதி மண்டையோடுகளை கழுத்தில் மாட்டிக்கொள்வது மாதிரி சிவப்போடு ரத்தம் தோய்த்த நீண்ட துண்டு போட்டுக்கொண்டு லங்காவதி.முன்பு பதவி பயத்தால் சத்தம் போடாதே பக்சே என்ற அம்ஜத்கான் வந்து புடிச்சிட்டுப் போயிடுவான் என்ற பூச்சாண்டி காட்ட தலீவர் இல்லாததால் இங்கே குரல் கொடுத்தால் அங்கே அப்பாவிகளை அடிப்பான் என்று குழந்தையை தூங்க வைக்கும் முயற்சியில் ஒரு சில கதர் கலரும்.கத்துவதே இந்திய ஜனநாயகம்ன்னு நாம சொன்னா கத்திக் கத்தி என்ன பலன்? டெல்லி வரும்போது  தமிழ் தலைகள் நேரா லங்காவதிகிட்டேயே சாஷ்டாங்கமாக காலில் விழுந்து பார்க்கலாமே என  நேத்தைக்கு ஒரு அதி புத்திசாலி மூத்த பத்திரிகையாளன். போர்க்குற்றமாவது வார்க்குற்றமாவது? 

தனித்தனியா நண்டு வளையமா இருந்தாலும் இப்போதைக்கு இருக்கிற வலுவானதோ அல்லது வலுவற்றதோ ஒரே ஆப்பு தமிழ்நாட்டுலருந்து வரும் குரல்தான்.அதனையும் புடிஙகி போட்டுட்டா கேட்கறதுக்கு ஆளே இல்லை.லங்காபதி ஆடு சிங்கே ஆடுன்னா எசப்பாட்டும் சேர்ந்தே பாடுறேன்னு 13க்கு அடுத்த 14 அல்ல 13+ புகழ் பாடும் தெக்கச்சிக்கு வில்லி சுஷ்மா என்ற கட்டச்சி.இருக்குறதெல்லாம் ஈயம் பித்தளைக்கு பேரிச்சம் பழம்தான்.சில்வர் முகம் பூசிக்கொண்ட ஈயக்கம்பிகள்தான்.எதற்கும் சூரிய ஒளிப்பிரகாசமில்லை.

சூரியனே மானோடும் மயிலோடும் சக்கர நாற்காலியில் சம்மணம் போட்டு உட்கார்ந்து கிட்ட போது ஓட்டுப்பிச்சைக்காக பறந்து வரும் வால் நட்சத்திர ஒளியை நம்பிப் பயனில்லையென்பதை காவி(ய) காதலனுக்கு பட்டு குஞ்சம் சுத்திகிட்ட சுஷ்மிதமாக சொல்லி விட்டார்.நமக்கு பிறந்து வீடும் சரியில்லை.ஆமைகள் புகுந்த வீடும் சரியில்லை.

.பழைய காலத்து அனுமான்  வாலோடு லங்காவுக்கு பறந்த மாதிரி நவீனமா அனுமாளுக்கு பட்டுச்சேலை கட்டி விட்டு விமானத்தில் பறக்க விட சந்தித்தேன் உன்னை நான் சந்தித்தேன்!என்னை நீ  எப்போ சந்திப்பாய் என்று சுஷ்மிதமா டூயட் பாட கிடைத்த லொகேசன் தான் சாஞ்சி.நான் சீனாவோடு சோரம் போனாலும் ராத்திரியானா என்னைக் கட்டி அணைக்கத்தான் வேண்டுமென்ற வேண்டாத பொண்டாட்டியாய் இந்தியா.

இரண்டு பொண்டாட்டிக்காரன் மாதிரி சீனாவோடும்,இந்தியாவோடும் லங்காவுக்கு ஒரே அஜால் குஜால் குத்துப்பாட்டுத்தான்..சின்ன வீடும் பெரிய வீடும் குடுமி சண்டை போடுமா இல்ல சக்களத்திகளாகவே இருந்து சமாதானமாகிப் போகுமான்னு போக போகத்தான் தெரியும்.எப்பவும் பெரிய வீடுதான் மூக்கை சிந்திகிட்டு முகாரம் பாடும்ங்கிற குடும்ப விதிக்கேற்ப இந்தியாவும் மூக்கை சிந்துவதற்கு இப்பவே சளி பிடித்து விட்டது.இந்தியா பெரியண்ணன் என்பதை பெரியக்கான்னு மாத்தி வருடம் மூணாச்சு. சின்ன வீடு சீனா மேலதான் லங்காவதியோட கண்ணே மணியே தாலாட்டு.எப்படியோ ரெண்டு பொண்டாட்டிக்காரன் அதிர்ஷடக்காரன்தான்.பெரியக்கா பாடுதான் பார்க்க சகிக்கல.

லங்காபதியின் இந்திய வருகை சுஷ்மா தூபம் போட்டு சாஞ்சிக்கு வந்த சாபம்.

ராகுல் காந்தி பிரதமராவது சாத்தியமா?

பதிவுக்குப் போறதுக்கு முன்னாடி யாராவது கடைப் பக்கம் வந்தீங்கன்னா வடை சூடா கிடைக்குதா அல்லது முன்பு மாதிரியே ஆறிப்போய்த்தான் கிடைக்குதான்னு தயவு செய்து சொல்லுங்க.காரணம்,முன்னாடி பதிவர்கள் சித்ரா   கடை திறக்க ரொம்ப நேரமாகுதுன்னு சொல்லியிருந்தாங்க.போன வாரம் பதிவர் கிரி ஒன்னு டெம்ப்ளட் மாத்துங்க அல்லது வேண்டாத ஸ்கிரிப்ட்டுகளை தூக்குங்க என்றார்.இப்ப வேண்டாத ஸ்கிரிப்ட்டையெல்லாம் தூக்கி எறிஞ்சு எளிதான டெம்ப்ளட்டைத் தேர்ந்தெடுத்துள்ளேன்.இக்பால் செல்வன் போன வாரம் போட்ட பதிவைப் பார்த்து Arial மற்றும் 12Px ஐ 13 Px ஆக மாற்றியுள்ளேன்.நேரம் கிடைக்கும் போது இன்னும் கொஞ்சம் மெல்லிய முகப்பூச்சு மட்டும் செய்யலாமுன்னு இருக்கிறேன்.எனவே பதிவு தரவிறக்கம்,பின்னூட்ட வேகம் பற்றி யாராவது சொல்லுங்க.

சரி!இப்ப கச்சேரி ஆரம்பிச்சிடலாம்.

இவ்வளவு நாள் என்னமோ விளையாட்டுத்தனமா நேரு மாமா,இந்திரா காந்தி அன்னை,ராஜிவ் அண்ணன்னு சொந்தம் கொண்டாடி மன்னராட்சிக்கு மாறாக ஒரு பரம்பரை ஆட்சி வருவதற்கு இந்திய மக்கள் துணை போய் விட்டார்கள்.தமிழகத்திலும் கருணாநிதி அதற்கான வித்திட்டார்.தற்போதைக்கு அந்த கனவுகள் தவிடு பொடியாகி விட்டது ஒரு புறமிருக்க அதிகார பிறப்பின் இருப்பால்,விருப்பால் மத்தியிலும்,மாநிலத்திலும் அதற்கான சூழல்கள் உருவாகக் கூடும்.சுயமான முயற்சியாளர்களாய் இருந்திருந்தால் ராகுல்,ஸ்டாலின் போன்ற ஆளுமைகள் இந்தியாவிற்கு தேவையென்றாலும் வாரிசு அரசியலின் விளம்பரத்தால் இவர்கள் ஆட்சி பீடத்தில் அமர்வது இந்தியா என்ற ஜனநாயகத்திற்கு நல்லதல்ல.இருந்தாலும் மக்கள் தீர்ப்பே மகேசன் தீர்ப்பு என்கிற வாசகப் படி இதனை காலம் எப்படி பதிவு செய்யப்போகிறது என்று கணிப்பதற்காக வேண்டி இந்த பதிவு.

இப்ப சுப்ரமணியன் சாமி என்ன சொல்றாருன்னா,ராகுல் காந்தி பிரதமர் பதவிக்கு வர முடியாதாம்!ஏனய்யா உனக்கு எப்ப பார்த்தாலும் குட்டையக் குழப்பி விடுறதே பொழப்பா போச்சுன்னு அலுத்துக்கொள்றவங்களுக்கு அவர் என்ன சொல்றாருன்னா...சோனியா பெருந்தன்மையா பிரதமர் நாற்காலியை மன்மோகன் சிங்கிற்கு விட்டுக் கொடுத்திட்டதாகத்தான் நான் கூட முன்னாடி நம்பிகிட்டிருந்தேன்.ஆனால் சோனியாவுக்கே பிரதமர் நாற்காலி மேல ஒரு கண்ணு இருந்துச்சாம்.அதுல மண்ணை அள்ளிப் போட்டது நம்ம முந்தைய ஜனாதிபதி அப்துல் கலாம் என்கிறார்.எப்படின்னா சட்டப்படி சோனியா பிரதமர் ஆகமுடியாதுன்னு தமிழ்நாட்டுல இருந்து டெல்லிக்கு மூடிய கடிதம் போகிறமாதிரி ஒரு கடிதத்தை எழுதி அதனை சோனியாவுக்கு அனுப்ப அந்தக் கடிதத்தை படிக்கும் போது சாட்சியாக இருந்தவர்கள் அப்போது சதாம் உசைன் ஈராக் ஊழலில் சிக்கிக் கொண்ட நட்வர்சிங்கும்,பிரதமர் மன்மோகன் சிங்கும் என்கிறார் சுப்ரமணியன் சாமி.

எனவே ராகுல் காந்தி சோனியாவின் அனுபவத்திலிருந்து பாடம் கற்றுக்கொள்ள வேண்டும் என்றும் சோனியா மட்டுமல்ல அவரது இரு குழந்தைகளும் பிரதமராக முடியாதுன்னு பத்த வச்சுட்டார்.இதற்கு சுப்ரமணியன் சாமி சொல்லும் இன்னுமொரு காரணமென்னவென்றால் ராகுல் காந்தி இத்தாலியன் பாஸ்போர்ட்டில்தான் வேறு ஒரு பெயரில் ஐரோப்பா முழுவதும் சுற்றி வந்தாராம்.

Does Subramanian swamy got a valid point.? 

காலம்தான் இதற்கு பதில் சொல்லவேண்டும்.

எவன் மாட்டுவான்னே ராத்திரி தூங்குற போது சுப்ரமணியன் சாமி நினைச்சுகிட்டு தூங்குவாரோன்னு தெரியல. மாட்டுனது திக்விஜய் சிங்க். சிங்கை ஜன்பத்தின் ஊதுகுழல் என்று ஒரு காய்ச்சு 

நானே இந்த திக்விஜய் சிங்க் என்கிற காங்கிரஸ் சிங்குச்சாவை எங்கேயாவது ஒரு பிடி பிடிக்கனுமின்னு பார்த்தேன்.அதற்குள் சுப்ரமணியன் சாமியே முந்திக்கொண்டார்.ஹசாரேவும்,ராம் தேவும் ஊழலுக்கு எதிராக குரல் கொடுத்தா முந்தைய முதல்வர் கருணாநிதிக்கு திருமாவளவன் வாய்ஸ் கொடுக்குற மாதிரி காங்கிரஸ்க்கு ஊதுகுழல் திக்விஜய் சிங்க்.நல்லதுக்கு எதிர்ப்பு தெரிவித்தால் பரவாயில்லை,நீ ஏன் ஊழலுக்க்கு எதிராக குரல் கொடுக்கிறாய் என்று திக்விஜய் சிங் அறிக்கை விட்டா இந்தாளை என்ன செய்யலாம்?கரிச்சுக்கொட்டுறதத் தவிர வேறு வழியில்லை.

சரி காங்கிரஸ்தான் இந்த லட்சணத்துல இருக்குதுன்னு பார்த்தா பி.ஜே.பி சொல்லவே வேண்டாம்.தற்போது 2G.4G,ஆதர்ஸ்,காமன்வெல்த் ஊழல்....இதற்கு செயல்படாத பிரதமராக மன்மோகன் சிங்க்,ஊழலுக்கு எதிரான ஹசாரே,ராம் தேவ் குரல்கள்....எவ்வளவு அருமையான சந்தர்ப்பங்கள்.உருப்படியா ஏதாவது மக்களிடம் போய்ச் சேருகிற மாதிரி ஏதாவது செய்ததா என்றால் இல்லை.பல பத்திரிகைகளும்,சில தொலைக்காட்சி ஊடகங்களே இதுவரையிலும் எதிர்க்கட்சி செய்ய வேண்டிய பணியை செய்திருக்கின்றன.

உள்நாட்டுப் பிரச்சினைகளை பின் தள்ளி நாம் சீனாவுடன் தெற்காசிய பொருளாதாரத்தில் போட்டி போட வேண்டிய சூழலில் இருக்கிறோம்.ஊழல், மாவோயிஸ்ட்,பாகிஸ்தான் என்ற பெரும்பிரச்சினகளிலும் சாலை, கல்வி,சுகாதாரம் என்ற அடிப்படைக் கட்டமைப்புக்களிலும் பின் தங்கி 2020ல் இந்தியா வல்லரசு என்ற வார்த்தை இப்ப 2050க்கு பின் தள்ளப்பட்டு விட்டது.எனவே காங்கிரஸ் என்ற வாரிசு அரசியல்,பி.ஜே.பி என்ற மத அடிப்படைகளைக் கடந்து இந்தியா புதிய தலைமைகளையும்,கட்சி மாற்றங்களையும் கொண்டு வரவேண்டும்.அதனை கல்வி மேம்பாடு மட்டுமே செயல்படுத்தும்.

அரசியல் பதிவு போடக்கூடாதுன்னு பார்த்தாலும் இந்த மாதிரி செய்திகள் ஏதாவது கண்ணுல பட்டா .நான் என்ன செய்வேன்:) 

ரஜனி VS கே.ஆர்.பி செந்தில்

Dear Senthil !

 நண்பர்களின் இடுகைக்கு பின்னூட்டமிடும் போது மனதின் ஓட்டத்தில் தட்டச்சுவதால் கூகிளண்ண்ன் நீ வரம்பு மீறுகிறாய் என்று பல சமயம் எச்சரிப்பதால் பின்னூட்டமாய் போட வேண்டியதை இடுகையாக்குகிறேன்.

செந்தில்!நாம் பொது நலன்களை ஒரே பார்வையில் பார்ப்பதால் எனது பின்னூட்ட இடுகையான இந்த பதிவுக்கு உங்களின் தலைப்பே முக்கியம் என்பதால் முதலில் பின்னூட்ட இடுகையிட்டு விட்டு அப்புறம்  உங்களின் இடுகையை காணப் போகிறேன்.

கடந்த சில தினங்களுக்கு எனது இடுகைக்கு பிறகு தமிழகத்தில் எழும் குரல்களை  கூர்மையாக கவனித்து வருகிறேன்.முதலாவதாக எழுந்த குரல் வை.கோ.அடுத்து திருமா வளவன்.அடுத்து நெடுமாறன் அவர்கள்.இவர்களின் பொதுவான எதிர்ப்புக் குரல் ஒன்றாக இருந்தாலும் ஒவ்வொரு திசையிலிருந்தும் குரல் எழுப்புவதால் அதன் தாக்கம் மக்களைப் போய்ச் சேர்வதிலலையென நினைக்கிறேன்.அதன் பலன் தி.மு.க VS அ.தி.மு.க என்ற பழைய வட்டத்துக்குள்ளெயே  தமிழகம் வலம் வருவது தவிர்க்க இயலாததாகிறது.

எம்.ஜி.ஆர் காலம் தொட்டு சினிமாவின் ஆதிக்கம் அரசியலில் நுழைவது நல்லதல்ல என்றே நினைத்து வந்திருக்கிறேன்.ஆனால் நினைப்புக்கும் அப்பால் ரசிகர்கள் என்ற வட்டமும் அதனையொட்டிய யதார்த்தம் என்ற நிலையையும் யோசனை செய்தால்  எம்.ஜி.ஆரின் அரசியல் பிரவேசமும் அதனைத் தொடர்ந்த அரசியல் நிலைகளும் யோசிக்க வைக்கிறது.எனவே இப்படி இருக்க வேண்டும் என்று நினைப்பதை விட இப்படியும் நிகழும் யதார்த்தங்களை சிந்திக்கும் போது மாற்று அரசியலுக்கு ரஜனி என்ற காந்தம் மக்களுக்கு நிச்சயமாகத் தேவைப்படுகிறது.அதற்கான சூழல்கள் முன்பொரு காலத்தில் மூப்பனார் காலத்தில் இருந்தது.ஆனால் அதனை ரஜனிகாந்த் தவற விட்டு விட்டார் எனலாம்.இருந்தாலும் ரஜனி எனும் காந்தம் இன்னும் மக்களை வசீகரிக்கிறது.இவரால் தமிழகத்துக்கு மாற்றம் வராதா என்று பலரும் நம்பும் தருணம் இருக்கிறது அரசியல் நுழைவின் விளைவுகள் எப்படியிருந்த போதிலும். 

எனக்கு முன்பு மக்கள் கலை இலக்கிய கழகமான வினவு தள குழு பற்றி எதுவும் தெரியாது.சமூக உணர்வுள்ள புதிய இயக்கங்கள் சமூகத்தில் வலம் வருவதை வரவேற்கிறேன்.ஆனால் இவர்களின் முரண்நகை நீங்க ஆட்டத்தில் சீக்கிரம் வெளியேறுகிறீர்கள் என்றே உங்களின் பின்னூட்ட்ங்களும் ஏனைய நண்பர்களின் பதில்களும் பறைசாற்றுகின்றன.

முன்பு வானம்பாடிகள் பாலாவின் பின்னூட்டமொன்றிற்கு(இடுகை நினைவில் இல்லை) சொன்ன பின்னூட்ட விடையை இப்பொழுது அவிழ்க்கப் போகிறேன்.ரஜனிக்கு கருணாநிதியென்ற மரியாதை நிமித்தமோ அல்லது அவரது ஆட்சி காலத்தில் அரசியலுக்குள் நுழையக்கூடாது என்ற செண்டிமெண்ட் காரணம் கூட  இருக்ககூடும்.அதே நேரத்தில் மக்களுக்கு நல்லது செய்ய வேண்டும் என்ற எண்ணமும் அதற்கும் மேல் மெட்டீரியலிசத்துக்கும் அப்பால் ஆன்மீக வாழ்க்கை. பிடித்ததாகக் கூட இருக்க கூடும்.இப்படியொரு குழப்பமான மனநிலை காரணமாக எப்ப வருவேன் என எனக்கே தெரியாது என்ற  திரைப்பட வசனங்களும் கூட குழப்பமான சூழலை உருவாக்குகிறது.எது எப்படியிருந்த போதிலும் தமிழகத்தின் மாற்று அரசியலுக்கு சரியோ தவறோ ரஜனியை விட்டால் வேறு வழியில்லையெனக் கருதுகிறேன்.

விரும்பினாலும் விரும்பாவிட்டாலும் காலம் அதன் கடமையை செய்யவே செய்யும்.அதற்கு பின்னாலான அரசியல் மாற்றங்களுக்கு ஈடு கொடுக்க ஒரு வலிவான மனிதனும் அதன் பின் ஒரு அமைப்பும் தேவை.அதற்கான வல்லமை ரஜனிக்கு இருக்கிறது.தேர்ந்தெடுப்பதும் ஆன்மீகம் மட்டுமே என்ற சுய அனுபவங்களைப் பெறுவதும் ரஜனியின் கரங்களில்!

டிஸ்கி! இது இடுகையல்ல!பின்னூட்டம்.இவ்ளோ பெரிய பின்னூட்டத்தை கூகிளண்ணன் அனுமதிப்பார் என நீங்கள் நினைக்கிறீங்களா:)

CWG விளையாட்டும் கல்மாடியும் டெல்லி அரசியலும்

காமன்வெல்த் போட்டிகளின் மொத்த குழறுபடிகளுக்கு இரண்டு முக்கிய காரணங்கள்.ஒன்று கல்மாடியின் ஊழல் நிர்வாகம்.இரண்டு டெல்லியின் முதலமைச்சர் ஷீலா தீக்சித்க்கு மாநிலப் பங்கீடின்மை. எனவே குழறுபடிகளின் நிலைகளில் இருவரும் வேறுபடுகிறார்கள்.எப்படியென்றால் கல்மாடியின் நிர்வாகத் திறமையின்மைக்குப் பின் ஊழல் விரிச்சாடுவது இடிந்த பாலம்,நடைபாதைப் பாலம்,புதிதாகக் கட்டிய பாத்ரூம்களின் வெத்திலைப் புகையிலை (புகையில என்று நினச்சிருப்பாரோ கல்மாடி)எச்சில் துப்பல்கள் என்ற இந்திய சுகாதாரம் போன்றவை அப்பட்டமாகக் காட்டுகின்றன.

2003 ம் ஆண்டிலிருந்து 7 வருடங்கள் எனும் போது இரண்டாவது முறை வருவதற்கு வாய்ப்பில்லை!சுருட்டுவதற்கு இதை விட்டால் வாய்ப்பில்லை என்று முதல் இன்னிங்ஸில் கணக்குப் போட்டிருப்பாரோ? நேற்று காமன்வெல்த் துவக்கவிழாவில் கல்மாடி பேசும் போது ஆடிட்டோரியம் முழுக்க பூ....பூ என்ற மக்களின் எதிர்ப்புச் சத்தத்தை மக்களின் மகிழ்ச்சி ஆரவாரக் குரல் என்று நினைத்திருப்பாரோ கல்மாடி? ஒரு சிறந்த பொருளாத நிபுணராக, ஆனால் முதுகெலும்பில்லாத பிரதமராக மக்களின் கல்மாடி எரிச்சல் குரல்  சத்தங்கள் என்பது  தெரிந்தோ அல்லது தெரியாமலே கல்மாடிப் பேச்சுக்கு கைதட்டுகிறார் மன்மோகன்சிங். பார்க்க சகிக்கவில்லை பிரதமரே!

விளையாட்டுக்கள் முடிந்த பின்னாவது கல்மாடிக்கு ஆப்பு காத்திருக்கிறதா என்று தெரியவில்லை.எப்படியோ மணி சங்கருக்கு அவல் மெல்ல சந்தர்ப்பம் கிடைச்சாச்சு கல்மாடி.இவரு கல்மாடியில்ல களவாடியின்னு அறிக்கை விடப்போறாரு பாருங்க.அதுவும் பத்தாம ஆப்புன்னா நாற்காலியும் புடுங்கப் போறாரு.இது என்னோட கணிப்பு.பார்க்கலாம் என்ன ஆகிறதென்று. இது  நடக்கலின்னா இதெல்லாம் அரசியலில் சகஜமப்பான்னு தோளில் துண்டைப் போட்டு போய்க்கிட்டே இருக்கவேண்டியதுதான்.

அடுத்து ஷீலா தீக்சித்! டெல்லியின் முதலமைச்சர் என்ற காரணம் கொண்டே இவரால் சுயமாக செயல்பட இயலாத நிலை.மத்திய அரசும்,மாநில அரசும் ஒரே இடத்தில் இருந்தும் நிர்வாகப் பங்கீடுகளுக்கான stream lining இல்லை.விளையாட்டுத்துறையோ கல்மாடியிடம்.டெல்லிக்கு வரும் அவப்பெயரோ முதல் அமைச்சருக்கு.மத்திய,மாநில அதிகாரப் பங்கீடு அரசியல் பனிப்போர்கள் கூட உலக அரங்கில் இந்தியா அவமானப்பட்டதற்கு காரணம் எனலாம்.இறுதி மூன்று தினங்களில் முதலமைச்சர் ஷீலா தீக்சித் பொறுப்பேற்றுக்கொண்டு ஓரளவுக்கு நிவர்த்தி செய்து விளையாட்டுப் போட்டிகளை துவங்கியிருக்கிறார்கள்.Let the game begin என்று சார்லஸ் சொல்வதற்கு பதில் இந்திய ஜனாதிபதி முந்திக்கொண்டார் என்ற கிசுகிசு வேறு கேள்விப்பட்டேன்.

எவ்வளவு ஓட்டம் ஓடியிருப்பேன்!தங்கமெல்லாம் கொண்டு வந்து இந்தியாவைப் பெருமைப்படுத்தினேன்.எனக்கு வெத்தலை பாக்கு வைக்கலியேன்னு பி.டி.உஷா அக்கா ஒரு பக்கம் புலம்பல்.உஷா அக்கா! டெல்லி முழுதும் சேட்டன்,சேச்சிகள் பீரோகிரசியில் இருந்தும் எப்படி கோட்டை விட்டாங்கன்னு தெரியலையே!எப்படியோ நீங்க புலம்பறது நியாயம்தான்.ஆனால் விளையாட்டில் சாதனை என்பதெல்லாம் இந்தியாவில் கடுகு மாதிரி கண்ணுக்குத் தெரியாது.விளையாட்டு முடிந்து மூணாவது நாள் துவங்கி மறுபடியும் மக்களின் கவனம் கிரிக்கெட்ல போயிடுமில்ல.

நான் என்னமோ எங்க பதிவு மக்கள்தான் என் பதிவை சுட்டுட்டாங்க,என் இடுகையை என்னைக் கேட்காமலேயே பத்திரிகைல போட்டுகிட்டாங்கன்னு இதுவரைக்கும் கேள்விப்பட்டிருக்கிறேன்.இப்ப bjc.com ன்னு கூகிள் அண்ணன்கிட்ட கேட்டா அவர் நேரா மன்மோகன்,சோனியா,ராகுல் காந்தி மூன்று பேர் படத்தைக் காண்பிச்சு அது இவங்க கடைதான்ன்னு சொல்றார்.பிஜேபிக்காரங்க கோவிச்சுகிட்டு காங்கிரஸ் மேல் கேஸ் போட்டிருக்காங்க.யோவ் உன்னோட கடைப்பேரு bjb.org ன்னு காங்கிரஸ் செய்தி தொடர்பாளர் அங்கே போய் பாருன்னு விரட்டுகிறார்.இவங்களே சைபர் கிரைம் செய்யறாங்க.இதுல பதிவுலக புள்ளப்பூச்சிகளையெல்லாம் சைபர் கிரைம்ல சேர்க்கனும்ன்னு பின்னூட்டம் போடறது நல்லதில்லை:)

இந்திய மக்களுக்கு சினிமா குஜாலாவுக்கும்,அரசியல் அடாவடிகளுக்கும் பஞ்சமேயில்லை போங்க!

 

அமைச்சர் ராஜாவுக்கு ஒரு வக்காலத்து

பக்கசார்புகள் இல்லாமல் சமூக நிகழ்வுகளை பிரதிபலிப்பதே பதிவுலகின் வெற்றியாக இருக்குமென்று நினைக்கின்றேன்.உண்மையான தமிழக மக்கள் மனநிலை எப்படியென்பதை முன்பெல்லாம் தேர்தல் முடிவுகள் சொல்லி விடும்.இப்பொழுது ஓட்டுக்கும் காசு என்ற புதிய அரசியல் அடிச்சுவடியில் தேர்தலின் முடிவுகளையும் கூட நம்ப இயலாது என்ற பாடத்தை 2009ம் வருடத்துக்கான பாராளுமன்றத் தேர்தலும் அதனைத் தொடர்ந்த தமிழக இடைத்தேர்தல் முடிவுகளும் வெளிப்படுத்தியுள்ளன.

பதிவுலக பார்வையில் கருணாநிதி மீதும்,தி.மு.க மீதும் கோபங்களையும், எதிர்ப்புக்களையும் வெளிப்படுத்தும் இடுகைகளே அதிகம் காணப்படும் நோக்கில் பார்த்தால் இந்த கோப உணர்வுகளை வெளிப்படுத்துபவர்கள் பெரும்பாலும் முந்தைய தி.மு.க ஆதரவு கொண்டவர்களாகவே இருப்பார்கள் என நினைக்கிறேன்.முந்தைய தி.மு.க எதிர்ப்புக்காரர்கள் ஒன்று அடக்கி வாசிக்கிறார்கள் அல்லது மடத்து அரசியல் மாற்றங்களால் ஜெ விட கா விட்ட க மேல் என்ற நிலைக்கு வந்திருக்கலாம்.எஸ்.வி.சேகரின் மொக்கை நாடகத்தின் வார்த்தை கட்டித் தழுவல்களும் நகைப்பைத் தரும் பாராட்டுரைகளும் அதனைத் தொடர்ந்த கட்சித் தாவல் முத்திரையும் கூட இதனையெல்லாம் உறுதிப் படுத்துகின்றன.ஆனால் பதிவுலகைப் பொறுத்த வரையில் கருணாநிதியின் நேசங்கள் நாசங்களாய் போன பின் அவர் மேல் உள்ள கோபத்தின் வெப்பம் அமைச்சர் ராஜாவையும் சுடுகிறதென்றே நினைக்கின்றேன்.ஆனானப்பட்ட டாடாவுக்கே பூச்சாண்டி காட்டிய பரம்பரைக்கு ஸ்பெக்ட்ரம் ஊதி தள்ளி விடக்கூடிய விசயம் என்பதை இது கார்பரேட் சண்டை என்ற காங்கிரஸ் தீர்ப்பின் துணை போதும்.

ஸ்பெக்ட்ரம் என்ற சொல் கடந்த ஆண்டுகளில் இருந்து புகைந்து கொண்டே இருக்கிறது.இப்பொழுது ஹெட்லைன்ஸ் டுடே ஸ்பெக்டரம் தொடர்பாக கார்பரேட் லாபியிஸ்ட் நீரா ராடியாவிற்கும்,அமைச்சர் ராஜாவுக்குமிடையில் நிகழ்ந்த பேச்சு வார்த்தையின் பதிவுகள் தம்மிடமிருப்பதாக கூறுகிறது.இந்த பேச்சு வார்த்தைகள் காங்கிரஸ் கூட்டணி 2009ல் இரண்டாம் முறையாக ஆட்சி அமைக்கும் துவக்க காலம் வரையிலான பேச்சுக்கள் என்பதையும் வருமான வரித்துறையால் சி.பி.ஐ அங்கீகாரத்துடன் பதிவு செய்யப்பட்டது என்றும் ஹெட்லைன்ஸ் டுடே சொல்கிறது.தம்மிடம் இருக்கும் ஆதாரங்களை இந்தியர்கள் முன் கொண்டு வருவதும் அதனுடைய நம்பகத்தன்மையை வெளிப்படுத்துவது மட்டுமே ஹெட்லைன்ஸ் ஊடகத்தின் பணியாக இருக்கவேண்டும்.மாறாக பயணத்தில் இருக்கும் ஒரு அமைச்சரை விமானதளத்தில் பேட்டி காண்பது ஜனநாயக மரபாக இருந்தாலும் கூட நச்சரித்து கேள்வி கேட்பது விமான பயணத்தில் இருக்கும் யாருக்கும் கோபத்தை உண்டாக்கும்.

ஹெட்லைன்ஸ் டுடே பேட்டிகாட்சியை அவர்களது தளத்திலேயே வெளியிட்டிருந்தார்கள்.அதனைக்காணும் போது அமைச்சர் ராஜாவின் கோபத்துக்கான ஊடக நிருபர் பெண்ணின் எரிச்சலூட்டும் தொடர் கேள்விகளின் முறைகளே கோபத்திற்கான காரணமாக தெரிகிறது.It could be with an intention of framing Mr.Raja too. வித்தைகள் கற்ற வித்தகர் டி.ஆர்.பாலு ஒரே வார்த்தையில் get lost சொல்லி தப்பித்துக் கொண்டார்.

ஸ்டாலின் vs அழகிரி

நீண்ட காலமாய் தொடர்ந்து அரசியலில் தனது நிலையை தக்க வைத்துக் கொண்டுள்ள ஸ்டாலின் தி.மு.க வின் வாரிசு அரசியலுக்கும் சட்ட அமைப்பில் இடம் இருந்தால் கருணாநிதியின் காலத்திலேயே முதல்வராவதற்கும் தி.மு.க சார்பில் முழு தகுதியுடையவரே.அதற்கான வெள்ளோட்டமாக முன்பே இளைஞரணி ஊர்வல மகுடம் சூட்டப்பட்டும் உள்ளது.எனவே கலைஞர் கருணாநிதி தனது வயதின் இயலாமையால் ஓய்வெடுக்க விரும்பினால் ஸ்டாலின் அரியணையேறுவதும் சரியே.

இதுவரை தமிழக வரலாற்றில் துணை முதல்வர் பதவி உருவாகியிருக்கிறதா என்று எனக்குத் தெரியவில்லை.அப்படி உருவாகியிருந்தால் அந்த மரபு வழியில் துணைமுதல்வர் பதவியில் தவறில்லை.அப்படியில்லாமல் இது புதுக்கலாச்சாரமாக தமிழகத்தில் முதல்வரின் மகன் என்ற முறையில் உருவாகுகின்றது என்றால் இந்தப் பதவி விமர்சனத்துக்குரியது.அதே வேளையில் கவர்னர் இதனை அங்கீகரித்திருப்பதும் இதில் சட்டத்திற்கு இடமிருக்கிறதென்றும் கருதவேண்டியிருக்கிறது.எனவே ஸ்டாலினின் நீண்ட அரசியல் வாழ்வில் பதவி உயர்வு என்பதை எந்தக் கண்ணோட்டத்தில் பார்க்கலாம் என்பதை உங்கள் பின்னூட்டத்தில் தெரிவித்தால் பயனுடையதாகும்.

கருணாநிதியின் குடும்ப அரசியலுக்கும் மதுரை கலாச்சாரத்துக்கு முத்திரையாகவும் பணத்தால் ஓட்டுக்களை வாங்கி ஜெயித்து விட முடியும் என்று நிரூபண அரசியலுக்கும் உருவாய் வந்துள்ளார் மத்திய அமைச்சர் அழகிரி.தனிமனிதனாக இவர் நல்லவனாகவும் அதன் காரணமாகக் கூட மதுரை இவர் வசம் வந்திருக்கலாம்.அது ஊடகங்களில் முன்னிறுத்தப் படாமல் போயிருக்கலாம்.ஆனால் அழகிரி என்றவுடன் ஆட்டோ என்ற முத்திரை எப்படி வந்தது எனத் தெரியவில்லை.இது அவரது தனிக் குணநலன்களா அல்லது மதுரை என்றவுடன் நினைவுக்கு வருவது இன்றைய தமிழக சினிமாவின் வளர்ச்சிக்கு ஆற்றிய பெரும்பங்கும் கலையின் மேல் உணர்ச்சி வசமான காதலும் அரிவாள் கலாச்சாரத்தின் ஊற்றாக மதுரை விளங்குவதும் அழகிரியின் தனிக்குணமாக மாற்றப்பட்டிருக்கலாம்.

நேற்று அபிஅப்பாவின் விமானத்தை தவறவிட்ட தமிழக மாணவர்களுக்கு அழகிரி உதவியதாக சூடான இடுகை காண நேர்ந்தது.மக்கள் மனோபாவங்கள் ஒருவரின் பொய்த்தோற்றங்கள் எப்படி கட்டமைக்கப் படுகின்றன என்பதற்கு ஒரு சிறந்த உதாரணம் அந்த இடுகை.டெல்லி தமிழ்நாடு இல்லத்தில் காலம் காலமாக எத்தனையோ தனிமனிதர்களாலும் தமிழக மத்திய அமைச்சர்களாலும் ஊடகத்தின் வெளிச்சத்துக்கு வராத எத்தனையோ நிகழ்வுகள் நிகழ்ந்திருக்கலாம்.ஆனால் பெயர் தெரிந்த ஒரு தனிமனிதனுடைய முகத்துக்குப் பின் இருக்கும் பலவீனங்கள் நிறை குறைகளை எடை போடாமல் துதிபாடும் துவக்க விழா நடத்துவது பலவிதமான பரிமாண எழுத்துக்களை பார்வையிடும் பதிவர்களுக்கு நல்லதா?

இடுகைகளிலும் இணைய திரட்டிகளிலும் பகுத்தறியும் சந்தர்ப்பங்கள் அமைபவர்களே ஓரப்பார்வை பார்க்கும் போது அன்றாட பிரச்சினைகளில் அல்லல் பட்டு வீட்டுக்கு வந்தால் திரைப்படமும் சீரியலும்தான் உலக நிகழ்வுகள் என காட்டும் தொலைக்காட்சி நிகழ்ச்சிகளின் நுகர்வோர்களை குறை சொல்வதிலும் அவர்கள் மீது தேர்தல் தோல்விகளின் கோபங்களை காண்பிப்பதிலும் என்ன நியாயம் இருக்க முடியும்?

அமைச்சர் அழகிரியின் செயல்திறனை விமர்சிப்பதற்கும் ஏனைய தமிழக அமைச்சர்கள் எப்படி செயல்படுகிறார்கள் என்பதற்கும் முதல் 100 நாட்கள் என்ற அமரிக்க அரசியலை இந்தியாவும் கடன் வாங்கிய நாட்களுக்குள் கணிக்கலாம்.

டிஸ்கி: எந்த தனிமனித விருப்பு வெறுப்புக்களுக்கும் கட்சிகளுக்கும் அப்பாற்பட்ட இடுகை.

சொல்லத் துணிந்த தமிழக அரசியல்

தமிழில் மேடைப் பேச்சுகளில் மக்களை மனம் கவர்ந்து ஆட்சிக்கு வந்த திராவிட கழக இயக்கமான தி.மு.க தனிமனித ஈகோக்களால் பிரிந்து தி,மு.க எனவும்,அ.தி.மு.க எனவும் பிரிந்து போனது.எம்.ஜி.ஆர் அரசியலுக்கு வந்தது எப்படி தமிழகத்தின் அரசியலை மாற்றி அமைத்ததோ அதே போல் கால சூழல்களால் அரசியலுக்கு வந்த ஜெயலலிதா தி.மு.கவின் அரசியலுக்கு வலுவான எதிர் சக்தியாக மாறினாலும் கூட இரு இயக்கங்களின் சில அரசியல் பார்வைகள் தமிழகத்திற்கு ஆக்க பூர்வமானதாக இல்லை.

ஏனைய மாநிலங்களுடன் ஒப்பிடுகையில் நிர்வாகத் திறமையில் இரு இயக்கங்களும் தமிழகத்தை முன்னிலைக்கு கொண்டு சென்றாலும் மாநிலத்தின் நன்மைக்கும் அப்பால் தனி மனித காழ்ப்புணர்ச்சிகள் வந்து குறுக்கே நின்று விடுகிறது.

கலைஞர் தனது வாழ்வே அரசியலாக்கிக் கொண்டதால் அரசியல் பால பாடங்களை கற்றுத் தேறி சமயங்களில் சகுனியின் பாத்திரத்தையும் ஏந்தி மொத்த மதிப்பீட்டில் சாணக்கியனாய் வளர்ந்து நிற்கிறார்.ஜெயலலிதா அரசியலுக்கு வந்த விதம் அவருக்கே சில சமயங்களில் ஆச்சரியத்தை உண்டுபண்ணியிருக்கக் கூடும்.பெண்ணுக்கே இயல்பான உடை,நகை,சொத்து மோகங்களில் அடிபட்டு ஓரளவுக்கு அரசியலின் நுனியைப் பற்றி மேலே வந்து விட்டார் எனலாம்.

இந்த இரு இயக்கங்களின் தலைவர்களும் போன தலைமுறைக்கான அரசியல்வாதிகள் என்பது போக இந்த இயக்கங்கள் அரசியலை வளர்த்த விதம் தமிழகத்தைப் பொறுத்தவரை மாற்றான் தோட்டத்து மல்லிகைக்கும் மணமுண்டு என்ற திராவிட வாசகங்கள் நடைமுறையில் நல்லதான மாற்று சிந்தனைகளையும் வரவேற்கவேண்டும் என்ற நாகரீகங்களை வளர்க்கவில்லை.கலைஞரின் ஆட்சியில் நிகழும் நல்லவற்றிற்கு பாராட்டும் மனப் பக்குவம் ஜெயலலிதாவிற்கும் அவர் வழி நடத்தும் கட்சிகாரர்களுக்கும் இருக்க வேண்டும்.மாறாக செய் புகழ் தி.மு.க விற்கு போய் விடுமே என தேவையற்ற வெளிநடப்புகளும் தங்களது மந்திரமே மைனாரிட்டி கவர்ன்மெண்ட் வாசகமும் தமிழக அரசியல் நாகரீகத்தின் போங்கை காட்டுகிறது.தனிமனித கோபங்களாக இரு பக்க சிறையடைப்புக்களும் உதாரணங்களாய் கண்முன் வந்து போகின்றது.

இரு தலைவர்களும் ஒரு தலைமுறையின் இறுதி விளிம்பில் நின்று கொண்டிருப்பதால் விவேகமான,பிரச்சினைகளை அலசி ஆராயும்,தொலை நோக்குப் பார்வையுள்ள திட்டமிடுதல் கூடிய இளைய தலைமுறை அரசியல் களம் புகுதல் தமிழகத்திற்கு நலன் பயக்கும்.

தி,மு,க தரப்பில் கட்சியினை மேலும் உயரத்துக்கு கொண்டு செல்லும் இளைய தலைமுறையினர் லெனின் உட்பட நிறையவே தென்படுகிறார்கள்.ஆனால் சொந்தங்களின் விவகாரங்கள் பொதுவுக்கு வந்தபோது இருந்த நம்பிக்கையின் தன்மை குறைந்து போனது.அ.தி.மு.க பக்கம் ஜெயலலிதா தவிர்த்து மக்களை வசிகரிக்கும் யாரும் நினைவுக்கு வரவில்லை.ஜெயலலிதா சொல்லிக்கொடுப்பதை அப்படியே ஒப்பிவிக்கும் கிளிப்பிள்ளைகள்தான் தென்படுகிறார்கள்.எஸ்.வி.சேகர் தெரிந்தும் உள்ளே சிக்கி விட்டா போதும் என வெளியே ஓடி விட்டார்.அன்புமணி,மாறன் சகோதரர்கள் இன்னும் நம்பிக்கையூட்டச் செய்கிறார்கள்.

நாமும் எம்.ஜி.ஆர் ஆகிவிடலாம் என்ற நம்பிக்கையில் அரசியல் புகுந்த நடிகர்களின் அரசியல் பார்வைகள் தீர்க்கமாயில்லை.சிரமப் பட்டு உழைத்து சினிமாவில் சம்பாதித்த பணத்தை மீண்டும் அரசியலுக்குள் செலவு செய்வதென்பதிலிருந்தே வியாபார நோக்கங்களுக்கான சிந்தாந்தங்கள் புரிகிறது.

வை.கோ கழகத்திலிருந்து பிரிந்து வந்த நாள்முதல் விடாமல் நிற்கும் ஒரே கொள்கை விடுதலைப் புலிகள் ஆதரவு.சிறை வாழ்க்கை உட்பட விடுதலை ஆதரவில் உறுதியாய் இருப்பது ஒன்றே அவரது கொள்கைக்கான பலம்.அதனையடுத்து அவரது பேச்சுத் திறன் மேடையின் கீழே நிற்பவனை வசீகரிக்க செய்யும்.இது தவிர்த்து நோக்கினால் அவரது அரசியல் சமரசங்கள்,பார்வைகள் அனைத்தும் கேலிக்கூத்து.இன்னும் காலம் தாழ்ந்து விடவில்லை வை.கோ விற்கு.வரும் காலம் திட்டமிடுதல்கள் சரியாக இருந்தால் சறுக்கல்களை நிவர்த்தி செய்ய இயலும்.பழ.நெடுமாறன் தமிழகத்தில் ஒரு சிறந்த அரசியல்வாதியாய் அனைவர் முன்னும் வலம் வந்திருக்க வேண்டியவர்.இரு கழக இயக்கங்களும் அவரை ஓரம் கட்டி விட்டார்கள்.

இதுவரை சொன்னவை சொல்லவா வேண்டாமா என கணினியில் தூக்கம் போட்ட எழுத்துக்கள்.ஆனால் இதனை பதிவேற்றி விடுவது என்ற தீர்மானத்திற்கு கொண்டு வந்தது நேற்றைய தொலைக்காட்சியில் கண்ட மு.க.அழகிரியின் பேச்சுக்கள்.மரம் வெட்டிய காலம் தொட்டே மருத்துவரின் அரசியல் பிடிக்காமல் போனது.ஆனால் தி.மு.க தனது தமிழ்ப் பாதையை விட்டுப் போன காலியிடத்தை நிரப்புகிறாரோ என்று மக்கள் தொலைக்காட்சியின் மேம்போக்கு தெரிந்தது.ஆனால் பதவியே பிரதானம் என்பதிலே கண் என்பது அவரது தாவல்கள் சொன்னது.தேர்தல் காலத்து கூட்டணித் தாவல் மருத்துவருக்கு மட்டுமே சொந்தமன்று.அதற்கு பட்டயம் போட கலைஞரும் முன்னோடிதான்.

இவர்களுக்குள் கொள்கை சண்டைகள் இருந்தாலும் எதிர் அறிக்கைகள் விட்டாலும் தரமிழந்து தாழ்ந்து விடவில்லையெனவே நினைக்கிறேன்.ஜெயலலிதா கூட உதிர்ந்த ரோமங்கள் என நெடுஞ்செழியனை வசைபாடியதை விட கீழே இறங்கி வந்து விடவில்லை.இரு கழகங்களும் எதிர்க்கட்சியை கொச்சையாகத் திட்டுவதற்கு தொண்டர்கள் என்ற பெயரில் காசுப்பேச்சாளிகள் வைத்திருக்கிறார்கள்.கலைஞர் மேல் இத்தனை கல்லடிகள் விழுந்தும் வாய் தரம் தாழ்ந்ததில்லை என நினைக்கிறேன்.ஸ்டாலின் கூட அரசியல் பக்குவம் பெற்று விட்டமாதிரியே தெரிகிறது.

ஆனால் இன்னொரு மகன் அழகிரிக்கு பேசத் தெரியவில்லையா அல்லது அவரது குணநலன்களைப் பிரதிபலிக்கிறதா எனத் தெரியவில்லை.நேற்று பின்புறத்து கதவு வழியாக அன்புமணி மத்தியபதவிக்குப் போனவர் என்றார்.அது அரசியல் விமர்சனம் சரி.ஆனால் அன்பு மணியை திட்டுவதாக நினைத்து "எல்லோரும் ராமதாஸை அரசியல் வியாபாரிங்கிறாங்க.ஆனா உங்கப்பன் அரசியல் விபச்சாரி" என்றாரே பார்க்கலாம்.மனம் பகீர் என்றது.மதுரையையும் வருங்கால தி.மு.க வையும் நினைத்தால் பயமாக இருக்கிறது.

பையன் தவறு செய்தால் அப்பனிடமே முறையிடுவது வழக்கம்.அப்பனாக மட்டும் இல்லாமல் தமிழகத்தின் முதல்வரின் மகன் என்ற காரணத்தாலும் கலைஞரே!அழகிரி என்று பெயர் கொண்டு இது அழகா?உங்கள் தலைமைக்கும் பெயர் காப்பாற்றவும் எவ்வளவு பொறுப்புக்கள் இருக்கிறது.உங்கள் வயதுக்கு உண்ணாவிரதம் இருப்பதே கவலைக்குரியது.ஆனால் அதையும் அரசியலுக்காக வேண்டி உண்ணாவிரதம் திருப்தி அளிக்கிறதென்றும் ஜெயலலிதாவின் தனி ஈழம் பெற்றுத் தருவேன் குரலுக்கு எதிர் கணையாக மாற்று அமைப்புகள் மூலமாவது ஈழம் அமைந்தே தீரும் என்கிறீர்கள்.இப்படித்தான் ஈழம் அமையவேண்டும் என்ற கனவு கண்டவன் கூட எப்படியாவது ஈழம் அமையவேண்டும் என்றுதான் நினைப்பான்.இப்போதைய மக்களின் அவலங்களை காண்பவர்களின் எண்ணம் கூட அதுவே.

ஈழ விடுதலை உணர்வுகளின் இந்தக் காலகட்டத்தில் ஒரு உரிமைப் போருக்கு குரல் கொடுப்பதோடு தமிழக அரசியலை மாற்றிப் போட இயல்பாகவே வந்த மக்கள் எழுச்சி தமிழக அரசியலையும் மாற்றி அமைப்பதற்கான அருமையான சந்தர்ப்பங்கள் அமைந்தது.ஆனால் திராவிட வேர்களின் நீளம் அதன் ஆழம் கண்டால் தமிழகமே!என் தமிழகமே!புதிய விழுதுகளை எப்பொழுது படைக்கப் போகிறாய்?

ஓட்டு பார்க்க நேரமாயிடுச்சு

சிலேட்டுக் குச்சி,பென்சில்,பேப்பர்,பேனான்னு இருந்தா வரும் விரக்திக்கு டபால்ன்னு வீசிட்டு போயிடலாம்.கணினில அதுவும் அலுவல்காரனடையத தூக்கி எறிஞ்சா முதுகில டின்னு கட்டி இருக்கிற இருப்புக்கு ரீசெசன்னு வீட்டுக்கு அனுப்பி விடுவான்.

ஒபாமா மாற்றங்கள் வேண்டும் கோசம் போட்டே ஜெயிச்சிட்டாரு.ஈழ அதிர்வுகளில் தமிழகமும் அரசியலில் மாற்றம் பெறும்ன்னு பதிவு தலைகள் எல்லாம் சொல்றத நம்பிகிட்டு தமிழகத்துல மாற்றம்ன்னா நாமளும் போய் ஒரு முத்திரை குத்திட்டு வரலாமுன்னு மனசுக்குள்ள திட்டமெல்லாம் இருந்துச்சு.நினப்புதான் பொளப்பக் கெடுக்கும் கண்ணு ஒழுங்கா வேலையப் பார்ன்னு உள்ளுக்குள்ளிருந்து வேற எவனோ கத்துறான்.

நடப்பு அரசியல்ல தலைகள் அவுகளுக்குன்னு ஒரு கணக்கு வச்சிருக்காக.இதெல்லாம் தெரியாம பழமையண்ணன் வேறு நொய்யலாற்று கணக்கு,வித்தைக்காரன் கணக்குன்னு அவரு பாட்டுக்கு விடை கேட்டுகிட்டுத் திரியறாரு.

மூணாவது அணின்னு புதுசா சிலபேரு கிளம்பியிருக்காக.போன முறை தமிழக எலெக்சனுக்கு ஹாட் மச்சின்னு பேரு சொல்லி பதிவருக ஊடு கட்டி விளையாடுனாக.ரெண்டு மூணு வருசம் கழிச்சி அந்தப் பக்கம் எட்டிப் பார்த்தா கடைசி பதிவு 2006ல தூங்கிட்டிருக்குது.ஹாட் மச்சி பதிவர்கள் திருந்திட்டாங்க:)

தி.மு.க,காங்கிரஸ் கூட்டணில விசயகாந்துக்கு வெத்தலை பாக்கு வச்சிருக்காகளாம்.கலஞரு பா.ம.க லருந்து யாரும் எட்டிப் பாக்கலேங்கிறார்.மருத்துவரு அங்கிருந்து யாரும் கூப்பிடலேங்கிறார்.கண்ணசத்துதேன்னு கண் மூடி திறந்தா காங்கிரசுலருந்து ப.ம.கவுக்கு டீ குடிக்கலாம் வாங்கன்னு அழைப்பு வந்திருக்காம்.சாயந்திரமா பார்த்தா கலஞரு திருமாவளவன் எங்க கூடத்தான் கூட்டு.அதனாலதான் அவர உள்ள தள்ளாம விட்டு வச்சிருக்கோம்ங்கிறாரு.அந்தப் பக்கம் பார்த்தா வை.கோ கண்ணப்பன காணோமுன்னு தேடிகிட்டு இருக்கிறாரு.தமிழுக்காரன் எதச் சொன்னாலும் நம்புறாங்கப்பான்னு செயலலிதா திடீர் உண்ணாவிரதம் இருந்திட்டாங்க.முட்டையடியும்,மொட்டைத் தலைகளும் சத்தத்தைக் காணோம்.

குருட்டுப் பார்வை பார்க்காம பதிவுக்காரங்களுக்கு அது சரி இது தப்புன்னு சரியாவே தெரியுது.இருந்தாலும் பதிவு வட்டத்தை தாண்டி பல்லாங்குளி ஆட முடியறதில்லை.வெண்ணிலா கபடிக் குழுவுல நல்லா ஆடுறவன் கைய முறிக்கிற மாதிரி வக்கீலுக மண்டைய உடச்சி இப்ப தி.மு.க வக்கீலு,காங்கிரஸ்கார வக்கீலுன்னு ஒற்றுமையக் களச்சாச்சி.குரலு விட்டவனையெல்லாம் பாதுகாப்பு சட்டத்துல பாதுகாப்பா வச்சாச்சி.இதெல்லாம் தெரியாம பதிவருக காங்கிரசுக்கு ஆப்பு,கலஞருக்கு மூப்பு ன்னு என்னென்னமோ புலம்புறாங்க.நல்ல நாள்லயே ஓட்டு போடாம ஊட்டுல தூங்கிற கேஸுக நிறைய இருந்துச்சு.இப்ப இருக்கிற நாட்டு நடப்புல சொல்லிக்கவே வேணாம்.

என்னமோ போங்க தமிழ்நாட்டு அழிச்சாட்டியம் தாங்காம பாகிஸ்தான் தமாசுகளைப் பார்த்தா சர்தாரிக்கும் நவாசுக்கும் நாற்காலி சண்டை.இருக்கிற கிச்சு கிச்சு பத்தாதுன்னு மும்பாய் குண்டுவெடிப்புல துவங்குன பிரணாப் பாகிஸ்தான் அறிக்கைகள் வேறு இன்னும் ஒய்ந்தபாடில்லை.

அடுத்த பிரதமரு யாருங்க?மன்மோகன் சிங்கா?எனக்கு லீவு வேணுமுன்னு நேத்தைக்கு சொல்லிட்டாரு.அப்ப ராகுல்?இல்ல அத்வானியா?ஜெயிச்சா லேப்டாப் தருவேன்ங்கிறாரு.அஸ்க்,புஸ்க் தமிழ்நாட்டுல தேறணுமே!மூணாவது அணில மாயாவதி விருந்துக்கு கூப்பிட்டுருக்காக!எதுக்கு?அவருக்கு பிரதமர் குர்ஸி வேணுமாம்.

யாரங்கே அலறுவது?குண்டுச்சத்தம் கேட்குதா?செத்த பிறகு வந்து அச்சச்சோ சொல்லுகிறோம்.எங்களுக்கு ஓட்டு பார்க்க நேரமாயிடுச்சு.