கண்ணா!ஐஸ்கிரிம் சாப்பிட ஆசையா!

முந்தைய பதிவில் சுகாசினி அக்கா கோபிச்சிட்டாங்களேன்னு ஊறுகாய் செய்வது எப்படின்னு பார்த்தோம்.சிரிக்கிறது எப்படின்னு பாலுமகேந்திரா படத்துக்கே கற்றுக்கொடுத்த எனக்கேவான்னு சுகாசினி அக்கா சொல்ற சிரிப்பை விட  Anu got a natural smile on her face always... சுகாசினி அக்கா மாதிரி பதிவர்களை சிடுசிடுக்காம எப்பொழுதும் சிரிப்பாகவே இருக்கும் அனுவுக்காக சின்னதா ஒரு டிப்ஸ் கொடுத்துட்டு பதிவுக்கு போகலாம்.காபி வித் அனு மாதிரியே இந்தி சினிமா பிரபலங்களுக்காக கரன் ஜோகர் Koffee with karan என்ற நிகழ்ச்சியை நடத்துகிறார்.காபி வித் கரன் எதுகை மோனை சரியாக வருகிற மாதிரி ஐஸ்கிரிம் வித் அனு பெயர் பொருத்தமாயிருக்குமே!எதுக்கு ஈயடிச்சான் காபி:)

சரி பதிவுக்கு வருவோம்!இப்ப சர்க்கரையோடு சண்டை போட்டுகிட்டவங்க,டயட்ன்னு வயிற்றைக் காயப்போடுறவங்க அடுத்த கடைல என்ன கிடைக்குமென்று பாருங்க.ஏன்னா இனிப்பா,குளுமையா,புரோட்டின்,கொழுப்பு சத்துடன் ஐஸ்கிரிமைப் பற்றி கதைக்கப் போகிறோம்.இனிமையாய் இருப்பதாலேயே குழந்தைகள் இனிப்பாய் இருக்கிறார்கள்.குழந்தைகளுக்கு மிகவும் பிடித்த இனிப்புக்களில் ஒன்று ஐஸ்கிரிம் என்பதோடு ஐஸ்கிரிமை அப்படியே சாப்பிடுவேனாக்கும் வசனம் பேசுறவங்கதான் அனைவருமே.ஆனால் ஐஸ்கிரிம் ருசிக்கே ருசி ஏத்தினா எப்படியிருக்கும்ன்னு யதேச்சையா சாப்பிட்டதுதான் ஐஸ்கிரிம் வித் கிரிம் காரமல்!

சவுதி அரேபியா மனித உரிமைகளிலும்,மத விசயத்தில் மட்டுமே அப்படி இப்படி.ஆனால் உணவு தரக்கட்டுப்பாட்டில் அட்சர சுத்தம்.சவுதி அரேபியா பால்,தயிர்,பழரசங்கள்,பிராய்லர் கோழி போன்றவைகளை அல்மராய்,ராணி,சவுதியா போன்ற லேபிளை பார்த்தவுடன் வாங்கி விடலாம்.முன்பொரு முறை பதிவர் KVR சவுதியிலிருந்து அல்மராய் என்ற பால் நிறுவனத்தைப் பற்றி   பதிவு போட்டிருந்தார்.மாடு மடியிலிருந்து உபயோகிப்பாளர் வாங்கி உபயோகிக்கும் வரை பால் மனித கரங்களில் படாது என்பது பெட்ரோலியப் பொருளாதாரம் நிகழ்த்தும் சாதனைகளில் ஒன்று.நாம் கூட தமிழகத்தில் சென்னை மாதாவரம் பால்பண்ணையில் இதனைப் பரிட்சித்துப்பார்க்கலாம்.அல்மராய் நிறுவனம் பால்,தயிர்,பழரசங்கள் போன்ற தயாரிப்புகளோடு பாலிலிருந்து தயாரிக்கும் கிரிம் காரமலை தயாரிக்கிறார்கள்.

Texture என்ற சொல் துணி,போட்டோஷாப்,இசை,ஓவியம் என்று பலதுறைகளில் உபயோகப்படுத்துவது போலவே உணவுகளிலும் பயன்படுத்தப்படுகிறது.உதாரணமாக டெக்ஸரைப் பொறுத்தே ரொட்டி,கேக் போன்ற பொருட்களின் மிருதுதன்மை காணப்படும்.அதே போல்தான் ஐஸ்கிரிமின் மிருதுதன்மையும்,கிரிம் காரமலின் மெதுமெதுப்பும் ஐஸ்கிரிமின் மிருதுதன்மையை விட சிறந்தது.சிலருக்கு ரஜனியின் நடிப்பு பிடிக்கும்.இன்னும் சிலருக்கு கமலஹாசன் நடிப்பு பிடிக்கும்.ஐஸ்கிரிமும்,கிரிம் காரமலும் ரஜனி,கமல் நடிப்பு மாதிரி.தனித்தனியாக இருந்தாலே பிடிக்கும்.அதுவும் ரஜனியும்,கமலும் சேர்ந்து நடிச்சா எல்லோருக்குமே பிடிக்கும்ங்கிற மாதிரிதான் ஐஸ்கிரிமுடன் கிரிம் காரமலைக் கலந்து கட்டி சாப்பிடுவது.கிரிம் காரமலை வீட்டில் கூட எளிதாக செய்து விடலாம்.

தேவையான பொருட்கள்:


500 மில்லி பால்
125 கிராம் சர்க்கரை
125 கிராம் சர்க்கரை (பொன்னிற சர்க்கரை பாகு)
2 தேக்கரண்டி நீர்
3 முழு முட்டை
2 முட்டையின் மஞ்சள் கரு
3 அல்லது 4 துளி வெனிலா சாறு
வேணுமின்னா கிள்ளின மாதிரி உப்பு

 2 தேக்கரண்டி நீரில் 125 கிராம் சர்க்கரையைக் கலந்து மெதுவான சூட்டில் சர்க்கரையை இளக்கி பொன்னிறமாக கெட்டியான பாகு வரும் வரை சர்க்கரையை தேக்கரண்டில கிண்டி எடுத்து இன்னொரு பாத்திரத்தில் ஊத்தி வச்சிட்டு பாலைக் காய்ச்சி சர்க்கரை கலந்து முட்டையைக் கலக்கி கூழ் மாதிரியான பதம் வரும் வரை கலக்கிக் கொண்டே இருக்க வேண்டும்.அடுப்பு சூடு 140 டிகிரி பாரன்ஹீட் என்று கூகிள் அனுபவங்கள் சொல்கின்றன.பின் சில துளிகள்(3-4 துளிகள்) வெனிலாவைக் கலந்து பொன்னிறப் பாகு கலக்கிய பாத்திரத்தில் ஆற வைத்து ஊற்றி பிரிட்ஜில் வைத்து குளிர வைத்தால் கிரிம் காரமல் தயார்.

டிப்ஸ்: பால்  காய்ச்சும் போது இதனை Simmering point எனப்படும் மெல்லிய நெருப்பில் செய்வதை விட கொஞ்சம் அதிக நேரமெடுத்துக்கொண்டாலும் பரவாயில்லையென பால் கலவைப் பாத்திரத்தை ஒரு சுடுதண்ணிப் பாத்திரத்திற்குள் வைத்து கிண்டினால் முட்டை திரியாமல் இருக்கும்.

இதையெல்லாம் யாரு போய் உட்கார்ந்து கலக்கிகிட்டிருப்பது என்று சலிப்பவர்களுக்கு உடனடி நிவாரணம் என்னவென்றால் ஐஸ்கிரிமையும்,கிரிம் காரமலும் சூப்பர் மார்க்கெட்டில் கிடைத்தால் வாங்கி ஐஸ்கிரிம் கப்பில் ஐஸ்கிரிமையும்,கிரிம் காரமலையும் குப்புற விழ வைச்சு கரண்டியில் அப்படியே சாப்பிடுவது நோகாமல் நொங்கு தின்னும் கலை.

(கூகிளிடம் சுடாமல் நானே சுட்ட நோகாத ஐஸ்கிரிமுடன் கிரிம் காரமல்)

Dessert should be consumed prior to the last course of coffee என்று பிரெஞ்சு உணவு இலக்கணம் சொல்கிறது.அதாவது டாஸ்மாக்,ஸ்காட்ச்,வைன் என்று எந்த மதுவை அருந்தினாலும் உணவு அருந்திய பின் நம்ம பதிவில் இருக்குற மாதிரி ஒரு இனிப்பு சாப்பிட்டு பின் பால் கலக்காத காபியைக் குடித்து உணவை முடிக்க வேண்டுமாம்.

இப்பத்தானே புரியுது நம்ம ஆளுக மட்டையப்போட்டு காலையில் ஏன் ஹேங்ஓவராகிங்கிறான்னு.தலைப்பை விட்டு பதிவு தலைதெறிக்க ஓடுறமாதிரி தெரியறதால இதோட முடிச்சிடலாம்! அதற்கும் முன்னதாக சமையல் பதிவுகளும் ருசியா இருக்குற மாதிரி தோணுறதால புதுசு கண்ணா புதுசா ஏதாவது கிடைக்குதான்னு பார்க்கிறேன்.

ஊறுகாய் செய்வது எப்படி?

கொஞ்சம் கதைச்சுட்டு அப்புறம் ஊறுகாய் செய்வது எப்படியென்று பார்ப்போம்.முன்பு ஒரு முறை பெரிசு சிறுசுன்னுஇல்லாம எல்லாரையும் போட்டு பதிவர்கள் தாளிக்கிறாங்க,இந்த பசங்க சுத்த மோசம்ன்னு சுகாசினி அக்கா எங்கேயே சொல்லி வைக்க அதை ஒட்டுக் கேட்டுட்டிருந்த பதிவர் ஓசை, பதிவர்களை எப்படி திட்டலாமென்று சுகாசினி அக்கா மேல் ஒரே கோபம்.அவங்களுக்கு கருத்து சுதந்திரமிருக்கிறதென்று பின்னூட்டத்துல சொல்லும் போது நானும் கடை திறந்து வச்சிருக்கேன் பேர்வழின்னு அருண் என்ற பேர்ல ஒருத்தர் ஒரு பதிவு கூட போடாம தான் சவுதியில இருப்பதாகவும்,பதிவுலகைப் பார்த்துதான் சமையலே கத்துகிட்டேன் என்று சொல்லியிருந்தார்.சுகாசினி அக்காவுக்கு குறைதீர்த்த மாதிரியும் ஆச்சு அப்படியே ஊறுகாய் சமையல் சொல்லிக் கொடுத்தமாதிரியும் ஆச்சுன்னு இந்த பதிவு.

அதோட ஊறுகாய் போன்ற பொருட்களின் அருமை நாக்கு செத்த வளைகுடா போன்ற நாடுகளில் வாழ்பவர்களுக்கே நன்கு தெரியும்.ஊறுகாய் மட்டுமல்ல இப்பொழுதெல்லாம் எங்காவது இந்திய கடைகளில் அபூர்வமாய் கிடைக்கும் கருப்பட்டி,பனங்கற்கண்டு போன்ற பொருட்களையெல்லாம் தேடிப்பிடித்து வாங்குவது எனது வழக்கம்.இதே மாதிரி நம்மூர் மசாலான்னு சக்தி மசாலா பாக்கெட் வாங்கியதில் கோழிக்கே குசியாகி ருசியாகி விட்டதிலிருந்து சக்தி ம்சாலாக்களையும்,ரசப்பொடி,சாம்பார் பொடியையும் கண்டால் விடுவதில்லை.இப்படி நற்பெயர் சக்திமசாலா காரணமாக இரு வாரங்களுக்கு முன்பு ஒரு சக்தி மசாலா மாங்காய் மற்றும் பூண்டு ஊறுகாயை வீட்டுக்கு கொண்டு வந்து அம்மணியிடம் வாங்கி கட்டிக்கொண்டேன்.காரணம் ஊறுகாய் ஒரே உப்பு மற்றும் ருசியில்லை.சில நிறுவனங்கள் வளர்கின்ற நிலையில் நன்றாக செயல்படுவார்கள்.வளர்ந்த பின் நிறுவனத்தின் தடுமாற்றம் நிறுவன உழைப்பாளிகளின் செயல்பாடுகளில் தெரியும்.முக்கியமாக ஊறுகாய் போன்ற உணவுப்பொருட்களில் உப்பு,ருசியின்மைக்கு தொழிலாளர் ஊதியம்,பணி திருப்தியின்மை போன்ற காரணங்களாகக் கூட இருக்ககூடும். ஈரோட்டுக்காரர்கள் சக்தி மசாலாவுக்கு தகவல் சொல்லி அனுப்பினால் நல்லது.

பெரும்பாலும் ஊறுகாயெல்லாம் நம்ம கைவண்ணத்திலேயே செய்து கொள்வது வழக்கம்.நம்ம கைப்பதத்துக்கு ஊறுகாய் சீக்கிரம் சீக்கிரமா காணாமல் போகுதேயென்று சில சமயம் சோம்பேறி பட்டுகிட்டு மீண்டும் செய்து வைப்பதுமில்லை.கடைகளில் வடுமாங்காய் பாட்டில்காரர்களும் கூட சரியான ருசியைக் கொண்டு வருவதில்லை.முன்பெல்லாம் வாழை மட்டையில் தாளித்து வைத்த ஊறுகாய்கள் கடைகளில் கிடைக்கும்.இவை முக்கியமாக கோவை மாவட்டத்தில் மிக பிரசித்தம்.இதே ஊறுகாய்கள் பிளாஸ்டிக் பாக்கெட்டுகளில் இப்பொழுது மறு அவதாரம் எடுத்திருக்க கூடும்.மலரும் நினைவுகளை விட்டு இப்ப வீட்டுல ஊறுகாய் செய்வதைப் பார்க்கலாம்.

எனக்குப் பிடிச்சது மாங்காய் ஊறுகாய்ங்கிறதால மாங்காய் ஊறுகாய் எப்படி செய்வதென்று பார்க்கலாம்.இளம் மாங்காய்கள் தேவைக்கு தக்கபடி அரைக்கிலோ அல்லது ஒரு கிலோ வாங்கி தொலைக்காட்சி சேனல் ஏதாவதை

ஓடவிட்டுக்கொண்டே மாங்காயை சின்னதா அரிந்து வைச்சு கொஞ்சமா உப்பு போட்டு 10நிமிசம் ஊறவச்சிடனும்.அப்படியே கொஞ்சம் பூண்டு,இஞ்சி விழுதா மிக்சியில் போட்டு பதமா அரைச்சு வச்சிக்கிடலாம்.நளபாக பிரம்மச்சாரிகள் மாங்காய் மாதிரியே அரிஞ்சும் கூட வச்சுக்கலாம்.(அரைச்சு,அரிஞ்சு தமிழ் மோனைகள் அழகாயிருக்குதில்ல)கொஞ்சம் பெருஞ்சீரகம்,குருமிளகு பவுடர் செய்து வைத்துக்கொள்ளலாம்.இதற்கு மிக்சிதான் தேவையென்று கிடையாது.நம்ம பாட்டிகள் வெத்தலை பாக்கை தையா தையத்தக்குன்னு இடிக்கிற பழைய காலத்து சின்ன இரும்பு உரலும் கூட போதுமானது.அம்மாக்களும்,பாட்டிகளும் இரும்பு உரலோடு முதியோர் இல்லத்துக்குப் போயிட்டாங்களேன்னு வருத்தப்படுறவங்க பட்டியலில் நானும் கூட சேர்ந்திருப்பேன்.பெண் பிள்ளை பெற்ற புண்ணியத்துல எங்கண்ணன் கிட்டேயிருந்து அம்மா தப்பிச்சிட்டாங்க.சரி சமையல் நேரத்துல செண்டிமெண்ட் வேணாம்.

மாங்காய்,இஞ்சி,பூண்டு முதல் கட்டமாய் சேர்த்திட்டோம்.

அடுப்படி மகாராணிகளுக்கு எந்த இடத்தில் என்ன பொருட்கள் இருக்குமென்பது அத்துபடியாக இருக்கும்.சிவபூசை கரடியாக நானும் ஊறுகாய் செய்வேனாக்கும்ன்னு சமையல் கட்டுக்குள் நுழைந்தால் அடுப்பை பற்ற வைத்துக்கொண்டு பொருளை தேடுவது சமையலின் ருசியை திசை திருப்பி விடும் என்பதால் ஒரு தட்டுல கடுகு,கடுகுக்கு துணையா உளுந்தம் பருப்பு, குண்டு மிளகாய்,கருவேப்பிலை,பெருங்காயம் தயாரா வைத்துக்கொள்ள வேண்டும்.மிளகாய்ப்பொடி,மல்லிப்பொடி,சீரகப்பொடி,குருமிளகுபொடி, கொஞ்சமா ஒரு சிட்டிகை மஞ்சள் தூள் போன்றவை கலந்து வைத்துக் கொள்வோம்.

கடுகு,உளுந்துப்பருப்பு,குண்டு மிளகாய்,கருவேப்பிலை, பெருங்காயம் ,மசாலாப் பொடிகள் சேமிப்பு இரண்டாம் கட்டமாய் தயார் செய்திட்டோம்.

ஊறுகாய் நிறைய நாட்கள் இருப்பதற்கும் தமிழ்ச்சுவை வருவதற்கும் நல்லெண்ணெய் அவசியம்.கேரளாக்காரர்களுக்கு தேங்காய் எண்ணெயும்,பெங்காளிகளுக்கு கடுகெண்ணையும் விருப்பம் ங்கிறதால இந்த விளக்கம்.சித்திரம் மாதிரி சமையலும்கூட கலை என்பதால் எந்த பொருளுக்கு எவ்வளவு விகிதாச்சாரம் தேவை ங்கிறதெல்லாம் அனுபவத்தில்தான் வரும்.எனவே நாம் முதல் கட்ட பொருளுக்கு தகுந்த மாதிரி நல்லெண்ணெய் சேர்ப்பது எப்படி என்பது அவசியம்.500 கிராம் மாங்காய்,50 கிராம் பூண்டு,50 கிராம் இஞ்சிக்கும் கிட்டத்தட்ட 100கிராம் மசாலாப் பொடிக்கும் 150 -200 மில்லி எண்ணெய் சரியாக இருக்குமென  நினைக்கின்றேன்.

இதுவரைக்கும் சொன்னதெல்லாம் ட்ரெய்லர்.இப்பத்தானே ஊறுகாய் தயாரிப்புக்கு வருகிறோம்.அடுப்பை பத்த வைத்து நல்லெண்ணெய் ஊற்றி சூடானவுடன் கடுகு,உளுந்து கலவையை போட்டு பட்டாசு மாதிரி வெடிக்க ஆரம்பிச்சா எண்ணெய் தயாராக இருக்குதென்று அர்த்தம்.அடுத்து கருவேப்பிலை,குண்டு மொளகாய்,இஞ்சி பூண்டை கலந்து,பெருங்காயம் மசாலாப் பொடிகளைப் போட்டு நுரை மாதிரி எண்ணெய்ப் பதம் இருக்கும் போது அடுப்பை விட்டு இறக்கி வைத்து அரிஞ்ச மாங்காயை கலக்கி உப்பு பார்த்து ஆறவைச்சிட்டா ஊறுகாய் தயார்.சில தினங்களில் ஊறுகாய் கமகம வாசத்துடன்.

இதுவரைக்கும் சொன்னது ஊறுகாய் எப்படி செய்வது எப்படியென்பதும் சுகாசினி அக்காவுக்கு பதிவுலகில் அனைத்தும்  பதிவு செய்யப்படுகின்றன என்பதும்.சக்தி மசாலா ஊறுகாயில் ருசியுமில்லை,உப்பு அதிகமாகப் போச்சேன்னு  சொல்லியிருந்தேன்.ருசியும்,உப்புமில்லைன்னு வாங்கின ஊறுகாயை அப்படியே விட்டு விட முடியுமா என்ன?பதிவில் சொன்ன அதே பொருட்களுடன் உப்பு மட்டுமில்லாமல் படத்துல இருக்கும் ஊறுகாயை கலந்து விட்டேன்.இந்தப் படம் க்ளிக்கும் போது ஊறுகாய் காலி:)

கோவை கொலையும் மறுபடியும் மும்பாய் குண்டுவெடிப்பும்

தமிழ் திரைப்படங்களில் வில்லனும் அவனது கூட்டமும் கலாட்டா செய்து ஒருவனைப் போட்டு அடிக்கும் போது வட்டமா சுத்தியிருந்து வேடிக்கை பார்க்கிற மாதிரி காட்சி வரும் போது கேனத்தனமான சண்டைக்காட்சியும்,இயக்குநர் திறனையும் பார்க்கும் போது மொத்த கூட்டமும் எப்படி வாய் பொத்தி வேடிக்கை பார்க்கும் என யோசிக்கத்தோன்றும்.தமிழ் திரைப்பட சண்டைப்பயிற்சியாளர்களே!தமிழ் இயக்குநர்களே!இனிமேல் எதிர்க்கேள்வியே போடமாட்டேன். ஏனென்றால் உங்களைப் பார்த்து மக்கள் அனிச்சையாக இயங்குகிறார்களோ அல்லது சமூக சூழலை நீங்கள் படம் பிடித்துக்காட்டுகிறீர்களோ தீயவை கண்முன் நிகழும் போதே வேடிக்கை பார்க்கும் கூட்டத்தை நேற்று தொலைக்காட்சியில் காணநேர்ந்தது.

இந்த பதிவுக்கு பின்னூட்டம் போட்டுக்கூட மனசு கொதிக்கிறது.ஒரு கார் விபத்து நடந்தா உதவுவதற்கு குறைந்தது 10,15 பேர் வந்து உதவும் வளைகுடா அரேபியர்களை மனித உரிமை மீறல்காரர்கள் என எளிதாக  முத்திரை குத்தி விட முடிகிறது.கோயம்புத்தூர் லட்சணத்தையெல்லாம் நினைச்சா எங்கிருந்து வந்து முளைக்கின்றன இந்த மாதிரி புதிய மனோபாவங்கள் என்று தெரியவில்லை.

நேற்று தொலைக்காட்சியில் நான்கு பேர் கூடி அடித்து கீழே தள்ளி உதைத்து அதிலும் ஒருத்தன் தலைமேலே கல்லைத் தூக்கிப் போட்டுக் கொன்ற காட்சியை பார்க்கும் போது ஊருக்கு உபதேசம் செய்யும் நம்ம மக்களின் லட்சணம் பல்லைக்காட்டி சிரிக்கிறது.பஸ்ல சில்லரைத்தகராறு, ஆட்டோக்காரன் கெட்டவார்த்தை என்ற சென்னை நகர் நல்ல பழக்கங்கள் இல்லாத ஊரா கோவை?பஸ்ஸில் கண்டக்டர் முன்னுக்குப் போங்கண்ணே என்று சொல்லி முன்னேறச் சொன்ன நகரமா இது?சைக்கிள்,கார்,ஆட்டோ, பஸ், காவல்துறை தவிர எத்தனை பேர் பைக் ஓட்டிய நகரமிது?வாழ்வில் சொகுசு வந்து விட்டால் மொத்த மக்களுக்கும் மண்ணின் கலாச்சாரம்  ஓரமா படுத்து தூங்குமா என்ன?ஒருத்தனை நான்கு பேர் அடித்து கண்ணெதிரிலேயே தலையில் கல்லைத்தூக்கிப் போடும் போது கோவை வட்டார வழக்காக சொல்லும் மயிரே போச்சு மாரப்பான்னு மொத்தக் கூட்டமும் அருகிலிருந்து டுர்,டுர்ரென்று பைக்கிலிருந்தும்,ஏனைய வாகனத்திலிருந்து கொண்டு வேடிக்கை பார்க்கிறார்கள்.கொலை செய்தவர்களோடு கொலைக்கு உடந்தையானவர்களுக்கும் தண்டனைங்கிற மாதிரி வெறுமனே வேடிக்கை பார்த்த சாட்சியாளர்களும் கொலைக்குற்றவாளிகளே.

 கண்முன்னே 10 அடி தூரத்தில் நிகழும் ஒரு கொடூரத்தைக் கண்டும் மரத்துப் போனவர்களாக நமக்கென்ன ஆச்சு என்று இருந்தால்....இதன் பிரதிபலிப்புக்கள் சமூகத்தில் ஏதாவது ஒருவிதத்தில் வந்து அவரவரையே தாக்கும்.

யோவ்!அந்தாளு என்ன செஞ்சான்னு தெரியுமான்னு கூட சிலர் தலையில் கல்லைத் தூக்கிப்போடுபவனுக்கு சார்பாக எதிர்க் கேள்விகள் கேட்கலாம்!

கசாப் என்ன செஞ்சான்னு உங்களுக்குத் தெரியுமா?

கசாப் என்ன செஞ்சான் தட்டச்சி முடித்து விட்டு பின்பு பதிவை இணைக்கலாமென்று நினைத்து கிழடாகிப் போன கிராண்ட் செரோக்கி ஜீப்புக்கு சாவி கொடுத்து எஃப்.எம் 100.1ல் பிபிசியைத் திருப்பினால் மும்பாயில் 3 இடங்களில் தொடர்குண்டு வெடிப்பு என்ற தகவலை சொல்லி வேறு தலைப்புக்கு தாண்டி விட்டது.NDTVயை க்ளிக்கினால் குண்டுவெடிப்பு படங்களோடு தீவிரவாத தாக்குதல்,லஷ்கர் தொய்பாவின் வேலை என்ற பக்க எழுத்துக்கள் ஓடிக்கொண்டிருக்கிறது.இந்த முறை நேரடியாக பாகிஸ்தானின் ஐ.எஸ்.ஐ சார்ந்த தீவிரவாத அமைப்புக்களின் பெயரை குண்டுவெடித்த 10நிமிடங்களில் முன்மொழிந்தால் simply counter protective mechanism and defence system are not working properly in India.

சமூக நிகழ்வுகளைக் கூர்ந்து கவனித்து வருவதால் குண்டுவெடிப்புக்கு பலகாரணிகளை முன் வைக்கலாம்.

• 1.நேற்று கசாப்பின் பிறந்தநாள் என்பதால் பிறந்தநாள் பரிசா என்று டெய்லிபயணீர் தளம் கேள்வியை முன்வைக்கிறது.
• 2.சமீபத்தில் தாவுத் இப்ராகிமின் காரில் துப்பாக்கி சூடு நிகழ்ந்ததாகவும் தாவுத் இப்ராகிமின் சகோதரன் காரில் இருந்ததாகவும் பின் இல்லையென்றும் மாறி மாறி தகவல்கள் வந்தன.முந்தைய தொடர்குண்டுவெடிப்பில் தாவுத் இப்ராகிமின் தொடர்பு உள்ளது.
• 3.அரசியல் சூழல்களில் ஆதாயம் தேட ஆர்.எஸ்.எஸ், சங்க்பரிவார்களின் கைவண்ணத்திற்கான முந்தைய சாட்சிகள் உள்ளன
• 4.2G,ஆதர்ஷ் கட்டிட ஊழல் போன்றவற்றின் அடிப்படையிலும் கூட அரசியல் காரணங்களோடு குண்டுவெடிப்புக்கள் உண்டாகியிருக்கலாம்.
• 5.Last but not least,ஒரு கண்ணைக்குத்தி இன்னொரு கண்ணுக்கு ஆதாயம் தேடும் காங்கிரஸையும் கூட சந்தேகக் கண்ணோடு நோக்கலாம்.Mr.Manmohan singh's administration is in a mere mess.
• நிர்வாக சீர்கேடுகளின் கேள்விகளைத் திசை திருப்பவும் கூட குண்டுவெடிப்புக்கள் நிகழ்ந்திருந்தாலும் கூட ஆச்சரியப்படுவதற்கில்லை.

IED (Improvised explosive device) எனப்படும் நாட்டு வெடிமருந்துகளைக்கூட நம்மை மாதிரி சராசரி மனிதர்களால் செய்து இயக்கி விடமுடியாது.கச்சாப் பொருட்கள் (Raw materials),அதனைக் கொண்டு சேர்க்கும் துணை(Logistics),தொழில்நுட்பம் போன்றவைக்களுக்கான தேவைகள் எளிதாக கிடைப்பதில் மேலே சொன்ன ஐந்துமே சந்தேக கண்ணோடு பார்க்க வேண்டியவை.

Won't Rule Out Any Angle on Mumbai Blasts:இதனை நான் சொல்லவில்லை...சொன்னது உள்துறை அமைச்சர் சிதம்பரம்.காங்கிரஸையும் சேர்த்து சொன்னாரா என்று தெரியவில்லை.முந்தா நாள்தான் மன்மோகன்சிங் சிதம்பரம் ரொம்பா...... நல்லா உள்துறையை பார்த்துகிறாரென நற்சான்றிதழ் கொடுத்தார்.

ஒரு பக்கம் தீயவைகளுக்கு எதிராக நாம் பதிவுகள் செய்து கொண்டிருக்க இன்னொரு புறம் மனிதம் மெல்ல செத்துக்கொண்டிருக்கிறது.

தொட்டு விடும் தூரத்தில் தமிழீழம்!

முதலில் புதிதாய் பிறந்த தென் சூடானுக்கு வாழ்த்துக்களை சொல்வோம்.ஈழத்தமிழர்களின் போராட்டத்தை எந்த தேசத்திற்கும் ஒப்பிடும் படியான தன்மை வியப்பான ஒன்று.இஸ்ரேலில் கொஞ்சம் கிள்ளி,பாலஸ்தீனத்தோடு சேர்த்து,கிழக்கு தைமூரில் கலக்கி,தென் சூடானில் நிரப்பி புவியியல் தட்டில் இட்டால் அத்தனை தேவைகளும்,சாத்தியங்களும் கொண்ட கலவையாகவே தமிழீழம் தென்படுகிறது.இலங்கை போலவே உள்நாட்டுப்போர்,இன பாகுபாடு,மதத்தின் கூறுகள் எனபவற்றுடன் இலங்கை ஜனாதிபதி ராஜபக்சே போலவே ஒன்றிணைந்த சூடானின் ஜனாதிபதி ஒமர் அல் பசீரும் உலக நீதிமன்றத்தில் போர்க்குற்றங்களுக்காக குற்றம் சாட்டப்பட்டவர்.உலக நீதிமன்றத்தில் இலங்கை கையெழுத்திடாத ஒற்றைக்காரணத்தோடு பாதுகாப்புச் சபையில் பிரிட்டன்,பிரான்ஸ்,அமெரிக்க கூட்டு முயற்சியில் போர்க்குற்றத்தை சுமத்தினாலும் உலகின் தேச விடுதலை தூ...துவர்கள் ரஷ்யாவும்,சீனாவும் தமது விடோ தகுதியால் ராஜபக்சேவை காப்பாற்றி விடும் சாத்தியமிருக்கிறது.கூடவே ஒப்புக்கு சப்பாணியாக போர்க்குற்றம் செய்த ராணுவ வீரர்களைக் கண்டிக்கிறேன் என்கிற பெயரில் சில சிங்கள ராணுவ வீரர்களுக்கு தண்டனை கொடுத்து விட்டு ராஜபக்சே குழுக்கள் தப்பித்துக்கொள்ளும் சாத்தியமிருக்கிறது.அதற்கு தகுந்தார் போல் 14 பேரை ஏற்கனவே கைதுசெய்துள்ளதாக இலங்கை செய்தியறிக்கை சொல்கிறது.

போர்க்குற்ற அறிக்கையை ஐ.நாவும்,பான் கி மூனும் பான் பராக் போட உபயோகிக்கிறார்களா அல்லது ஐ.நாவின் தார்மீக கடமைக்கு ஏதாவது ஒரு விதத்தில் அழுத்தம் கொடுக்கிறதா என்பதை கவனிப்பதோடு ஐ.நா சார்ந்த கடிதங்கள்,குரல்களை எழுப்புவதோடு மட்டுமல்லாமல் மக்கள் சார்ந்த குரலாக நிலத்திலும்,புலத்திலும் Referendum எனப்படும் மக்கள் ஒன்றுபட்ட இலங்கையில் வாழ விரும்புகிறார்களா அல்லது தமிழீழத்திற்கு ஆதரவை தருகிறார்களா என்ற திசையை நோக்கி கவனத்தை செலுத்துவது நல்லது.

 சிங்களவர்களைப்போல  வடசூடானும் இஸ்லாமிய ஆப்பிரிக்க அரேபியர்கள் என்ற ஒற்றைக்கோட்டில் உள்ளவர்கள்.தென் சூடானோ இயற்கை வழிபாட்டு பழங்குடியினர்,கிறுஸ்துவர்கள்,இஸ்லாமியத்தை தழுவியவர்கள் என்ற மூன்று வகையினராக வட,கிழக்கு தமிழர்களைப்போலவே சாதி என்ற உள்கட்டமைப்பு மாதிரி 200க்கும் மேலான பிரிவினராக வாழ்பவர்கள்.தென் சூடான் தேவை என்ற வாக்கெடுப்பில் 99 சதவீதமானவர்கள் வாக்களித்துள்ளார்கள்.இந்தியாவைப்போல் அரேபிய,இஸ்லாமிய சிந்தையில் எந்த வளைகுடா நாடுகளும் சூடான் இரண்டாகப் பிரிவதற்கு முட்டுக்கட்டை போட்டு விடவில்லை.

பிராந்தி...ய நலன் என்பதை விட பெட்ரோல் போன்ற அத்தியாவசியமான தாதுப்பொருட்களின் காரணம் கொண்டு  அமெரிக்காவின் ஆதரவு தென் சூடானுக்கு கிடைத்திருக்கிறதென்ற தவறான பார்வைகள் வெளிப்படுகின்றன.நேரடியாகப் பெட்ரோல் ஏற்றுமதி செய்துகொள்ள முடியாதபடி அரசியல் சட்ட சிக்கல்கள் அமெரிக்காவிற்கு இருக்கின்றது.தற்போதைய நிலையில் இந்தியாவும்,மலேசிய பெட்ரோனஸ் நிறுவனமும் நேரடி பலனை அனுபவித்துக்கொள்ள வாய்ப்புக்கள் உள்ளன.அதன் காரணம் கொண்டே பந்திக்கு முந்தி தென் சூடானை அங்கீகரிப்பதிலும் தூதரகம் அமைப்பதிலும் இந்தியா உடனே பச்சைக்கொடி காட்டி விட்டது.கடல்,துறைமுக வசதியில்லாது பெட்ரோலைக் கூட குழாய்களின் வழியாக வட சூடானின் வழியாகவே கடல்வழி துறைமுகத்திற்கு கொண்டு செல்ல வேண்டிய தடங்கல்கள் இருந்தாலும் கூட பெட்ரோலிய வருமானத்தை சமமாகப் பகிர்ந்து கொள்வது என்ற உடன்படிக்கையின் அடிப்படையிலும் கூட வட சூடான் தனி நாடு கோரிக்கைக்கு ஒப்புதல் அளித்தது.
 இலங்கையும்,இந்தியாவும் தமிழீழத்தின் தேவைக்கான காரணம் என்ன என்ற நல்லிணக்க எண்ணத்தில் தூரப்பார்வையில் செயல்பட்டால் இந்தியப் பெருங்கடலையும்,தென் ஆசிய உலகப்பொருளாதாரத்தின் வாசலாக ஆளுமை செய்கிற தகுதியை வருங்காலத்திற்கு அமைத்துக்கொள்ளும்.குறுகிய மனப்பான்மைகளையும்,அடக்குமுறைகளையும் மட்டுமே முன்வைத்து மனித உரிமைக்கும்,கலாச்சார அழிவிற்கும் வழிகளைத் தேடுமானால் இந்தியாவும்,இலங்கையும் இன்னும் சோக வரலாற்றையே எதிர்காலத்திற்கும் எழுதிவைக்கும்.பல நாடுகளின் சுயநலங்களுக்கான ஒற்றை நாட்டுக் கோட்பாடுக்கான தேவைகளை விட தனிநாட்டுக்கான தேவைக்கான மனித உரிமை உணர்வும்,கலாச்சார வேர்களின் காரணம் போல் ஆயிரம் இருக்கின்றன.

தென் சூடான் உலக நாடுகளால் அங்கீகரிக்கப்படுவதற்கு முன்பே நாடுகடந்த தமிழீழ அரசை அங்கீகரித்துள்ளது இன்னுமொரு சாதக நிலையை ஈழத்தமிழர்களுக்கு தோற்றுவித்துள்ளது.இதன் காரணம் கொண்டும் தமிழர்கள் தென்சூடானின் மகிழ்ச்சியில் பங்கு கொள்ளலாம்.எல்லைகள் இல்லாத தேசமே மனித வாழ்வின் உயர்வாக இருக்கமுடியும்.ஆனால் அதற்கான தூரம் இன்னும் வெகு அதிகமென்பதாலும் தேசியக்கோட்பாடே தேசங்களின் குரலாக இருப்பதால் மனித உரிமைக்கான குரல்கள் ஒலிக்கட்டும்.இன்னும் புதிய தேசங்கள் பிறக்கட்டும்.

  

30 நாட்களுக்குள் இந்தி கற்றுக்கொள்ள வேண்டுமா?

சாலமன் பாப்பையா நாதஸ்வரம் வாசிக்க சவுக்கு மத்தளமிசைக்க இந்தி கற்றுக்கொள்ளாமல் போய்விட்டோமே என்ற குரல்கள் மெல்ல ஒலிக்கத்துவங்கியுள்ளன.ஹிஸ்கோ இந்தி சீக்னக்கா தோ இந்தி பிக்சர் தேக்கோ! டீக்கே:)...அக்மார்க் இந்திப்படம் பார்த்து கற்றுக்கொண்டது.

வரலாறு ஒரே முறைதான் எழுதப்படும்.மனிதனின் பரிணாம வளர்ச்சியும் கூட அதனையொட்டியே தவழ்ந்து வந்திருக்கிறது.இந்தியாவின் மொத்த படையெடுப்புக்கள், தாஜ்மஹால், உலகப்போர், பெர்லின் சுவர், இந்தியா, பாகிஸ்தான் பிரிவினை, பங்களாதேஷ் புதிய நாடு, மனிதன் சந்திரனில் இறங்கியது என்று துவங்கி முந்தா நாள் கவிழ்ந்து படுத்துக்கொண்ட தி.மு.க,ஸ்பெக்டரம் ஊழல் என்பது வரை எல்லாமே எழுதி முடிக்கப்பட்டவை.புதிதாகவும் வரலாறும்,உலகமும் தன்னைப் புதுப்பித்துக்கொண்டே இருக்கின்றது.கூகிளிலிருந்து,லோக் பால் மசோதா தொட்டு தமிழீழ கனவு வரை நிறைய சொல்லிக்கொண்டே போகலாம்.எனவே எழுது முடிக்கப்பட்ட பக்கங்களை ஒரு போதும் மாற்றி விடமுடியாது.ஆனால் வரலாற்று நிகழ்வுகளின் பாடங்களை ஒட்டி மீண்டும் புதிதாய் எதனை புதிதாகப் புதிப்பித்துக்கொள்ளலாம் எதனை தவிர்க்கலாம் எதனை அதன் போக்கிலே விட்டு விடலாமென்று கற்றுணர்வது அவசியம்.

மேலே சொன்ன சிறுகுறிப்புக்கள் மாதிரிதான் இந்திப்போராட்டமும் தமிழக வரலாறாக முன்பே எழுதப்பட்டு விட்ட ஒன்று.திராவிட இயக்கங்களில் குறிப்பாக தி.மு.க கலைஞர் கருணாநிதியின் சுயநலத்தால் திசைமாறிப்போய் விட்ட ஒற்றைக்காரணத்தினால் மட்டுமே இந்திப் போராட்டத்தையோ,அதன் இந்திய சூழல்களையோ விரிவாக ஆராயமல் 50 வருடங்களுக்கும் அப்பால் இப்பொழுது உள்ளொன்றும்,புறமொன்றுமாக கருணாநிதி ஏமாற்றிவிட்ட கோபத்திலும் இந்தி கற்றுக்கொள்ளாதது தவறாகப் போய்விட்டதே என்ற ஆதங்கங்கள் எழுகிறது.மனித மூளைகள் ஒரு கால கட்டத்திற்குப் பின் அரித்துப் போகிறதா அல்லது மாற்றுச்சிந்தனையை உருவாக்குகிறதா என்று சந்தேகம் கொள்வது மாதிரியே அறிவுஜீவிகளாய் ஜெயகாந்தன், பெரியார்தாசன்,சாலமன் பாப்பையா போன்றோர்களின் கருத்துக்கள் அவ்வப்போது வெளிப்படுகின்றன.இறுதியில் தான் கொண்டிருக்கும் நம்பிக்கையில் மாறுபட்டு சந்தேகக்குரலோடு ஈனஸ்வரத்தில் ஒலித்து சமூகத்திலிருந்து மெல்ல காணாமல் போய்விடுவதையே பார்க்கிறோம்.

இந்திக்கும்,தமிழுக்கும் பங்காளித் தகராறு உண்டாக்கியதே இலங்கையின் மொழிக்கொள்கை மாதிரி நேரு காலத்து மொழிக்கொள்கையல்லவா? இப்போதைய இலங்கையின் நிலைக்குத் தள்ளப்படாமல் இந்தி எதிர்ப்பு போராட்ட மாணவர்களின் குரலுக்கு மதிப்பு கொடுத்து மும்மொழிக் கொள்கையை தமிழகத்தில் கைவிட்டதில் நேரு காலத்து காங்கிரஸ்க்கு பங்குண்டு.தனி நாடு,மாநில சுயாட்சி கொள்கைகளில் மொழி உணர்வை தூண்டி விட்டு இருமொழிக்கொள்கையை சாதித்ததில் தி,க,தி.மு.க கட்சிகளுக்கும் பங்குண்டு.இந்திப் போராட்டம் தமிழகத்தின் வரலாற்றின் பக்கம்.மொத்த தமிழகத்தின் மாணவர்களின்,மொழி உணர்வாளர்களின் உழைப்பும் உயிரும் ரத்தமும் கூட.மொழி உணர்வின் விளைவாக குலக்கல்வி கொள்கை கூட தமிழகத்தில் காணாமல்ப் போயிருக்கின்றன.

தமிழ்நாட்டில் பள்ளி,கல்லூரியில் இந்தி கற்றுக்கொள்ளாத காரணத்தினால் வடமாநிலங்களுக்குப் போகும் போது மொழிப்பிரச்சினை என்ற வாதம் சரியல்ல.கேரளாவில் இந்தி கற்றுக்கொடுக்கபடுகிறது.ஆனால் பள்ளியில் கற்கும் இந்தியும் வடநாட்டுப் பயணத்தில் உதவாது என்பதை அனுபவ  பூர்வமாக உணர்ந்திருக்கிறேன்.பிரவின் கேரளா,முகர்ஜி பெங்காளி நண்பர்களுடன் டெல்லி,கல்கத்தா,பம்பாய் என பயணம் செய்திருக்கின்றேன்.கேரள நண்பன் முக்கித் திக்கி பஸ் பெயர்களைப் படித்து விடுவான்.ஆனால் பேச வராது.நானோ இந்தி சுரைக்காய்.எனவே முகர்ஜி மொழி கைடு மாதிரி.எங்கும் பிரச்சினைகள் ஏற்பட்டதில்லை.கிணற்றுத் தவளை கதை சொல்லாமல் ரயிலில் டிக்கெட் எடுத்தோ எடுக்காமலோ தமிழகத்திலிருந்து பயணித்து வந்தோரை வாழவைக்கும் மும்பாய் சென்றடையும் தமிழர்கள் ஏதோ ஒரு நுனியைப் பிடித்துக்கொண்டு உழைத்துப் பிழைத்து விடுகிறார்கள்.அரபு நாடுகளில் குடியேறும் ஆசிய நாட்டுக்காரர்கள் பழக்கத்தில் வாழும் சூழலில் அரபி மொழியை பேசக் கற்றுக் கொள்கிறார்கள்.அதுவும் அரபிகளின் வீட்டில் வேலைசெய்யும் பணியாட்கள் மிக எளிதாகவே கற்றுக்கொள்கிறார்கள்.ஆனால் எனக்கு அரபி வருவதில்லை.காரணம் வாழும் அலுவலக,நண்பர்கள்,வீட்டுச் சூழல் போன்றவை.பிரெஞ்ச் கற்றுக்கொள்ள முயன்றும் அதற்கான சூழல்நிலைகள் அமையாததால் அதுவும் நாக்கில் ஒட்டிக்கொள்ளாமல் பான் ஜோர்,கொமத் தலாவு என்ற ஒரு சில வார்த்தைகளின் நினைவுடன் பிரெஞ்சுக்காரனிடமே பிரெஞ்சும் கூடப்படித்த இரு பெண்களும் கூட நினைவிலிருந்து மறைந்தே போய்விட்டார்கள்.எனவே தேவைகளும்,சூழலும் அமைந்தால் மட்டுமே மொழியும் கூட தன்னோடு ஒட்டிக்கொள்ளும்.

டெல்லி,பம்பாய்,கல்கத்தா என்று சுற்றியும் வராத மொழி இந்தி திரைப்படங்களைப் பார்க்கத் துவங்கியதும் மெல்லப் புரிந்தது.இந்தி சினிமாவின் பாடல்களின் வரிகள் இப்பொழுதும் புரியாமல் போனாலும் அதன் இசை கொள்ளை கொள்கிறது.கஜல் பாடல்கள் கண்ணை மூடிக்கொண்டு தியானம் செய்வது மாதிரி.மொழிக்கொள்கையில் மத்திய அரசு சாதிக்க முடியாததை இந்திப்படங்கள் சாதித்துள்ளன.அமிதாப் பச்சனின் காலத்து 20 வருடத்துக்குப் பின் பையன் பெரியவனாகி வில்லனைப் பலிவாங்கும் பாதாள தாதாக்களின் முதலீட்டு கதைகள் மாறி  உலக கூட்டு முயற்சியுடன் பல பரிமாண பரிட்சை செய்யும் படங்கள் மும்பாயில் உருவாகின்றன.நிலமோ மராட்டிய மாநிலம்.மொழியோ இந்தி.மராட்டியர்களுக்கென்று மொழி, கலாச்சாரமிருந்தும் அவற்றை புறம் தள்ளி விட்டு இத்தனைக்கும் சிவசேனாவின் தாக்கம் இருந்தும் இந்தி மும்பாய் பேச்சுவழக்கில் ஆளுமை செய்கிற மறுபக்கத்தையும் மறந்து விடக்கூடாது.

கூடுதலாய் எளிதாக மொழி கற்றுக்கொள்ளவும் தமிழுடன்,தமிழ்ப்படங்களுடன் சமன் படுத்திப் பார்க்கவும் இந்திப்படங்கள் பார்ப்பது நல்லது.கடந்த சில தினங்களுக்கு முன்பு கேபிள் சங்கர் ரூப்தேரா மஸ்தானா என்ற இந்தி பாடல் காணொளியை அவரது கொத்துப்புரோட்டாவில் இணைத்திருந்தார்.படம் ஆராதனா என நினைக்கின்றேன்.ஒரு முழுப்பாடலையும் எப்படி ஒரே ஷாட்டில் எடுத்துள்ளார்கள் என்று சொல்லியிருந்தார்.கற்றுக்கொடுக்கவும், கற்றுக்கொள்ளவும் சந்தர்ப்பங்கள் இப்பொழுது நிறைய.இதுவரையில் இந்தி பற்றி இணையத்தில் தேடவில்லை.ஒருவேளை இணையமே கூட இந்தி கற்றுக்கொடுக்க கூடும்.எனவே இந்தி கற்றுக்கொள்ள வேண்டி தமிழையும்,தமிழ் இலக்கியங்களையும் பின் தள்ள வேண்டிய அவசியமில்லை.
இந்தியை வாசி அல்லது இந்தியே தூசு என்று அவரவர் தனிப்பட்ட விருப்பங்களுக்கானது இந்தி.எப்பொழுதும் தமிழை சுவாசி.

கருணாநிதியை ஒபாமா என்று புகழ்ந்த வாலி இப்பொழுது ரங்கநாயகி புகழ்பாடுகிறார் காலத்தின் தேவை கருதியென்றாலும்

இலங்கையில்

இது காறும் நடந்தது -
போர் அல்ல;

தீவிரவாதப் போக்கினை அறவே...
தூர்க்கவேண்டித்
துப்பாக்கிகளில் -
ரவைகளை நிரப்பியதாம்
ராணுவம்!
சொல்கிறார்
'சோ’ ;
நாம் நாணுவம்!

என்று வசை பாடவும் தமிழை பள்ளியில் கற்றுத் தேறவேண்டிய அவசியமில்லையெனும் குதர்க்க புத்தி சோ போன்றவர்களிடமிருந்து தமிழை உரக்க சொல்ல  வேண்டியும் கூட தமிழை இன்னும் ஆழ்ந்து கற்பிக்க வேண்டிய அவசியமாகிறது.இப்பொழுதே தங்கிலீஷ் பேசிக்கொண்டிருக்கும் தமிழகம் இந்தியும் ஊடுருவுவதன் மூலம் ததிந்தி என்ற புதுச்சொல்லை உருவாக்கும் ஆபத்தும் கூட இருக்கிறது.

மொழி உணர்வுக்கும்,தமிழகத்தின் மாற்றங்களுக்கும் பாராட்டுக்களை கலைஞர் கருணாநிதிக்கு தெரிவிக்கும் அதே சமயத்தில் தொலைக்காட்சி ஊடகங்களின் ஆதிக்கத்தின் பிதாமகனாக தமிழகத்தில் தமிழ் மொழி வளர்ச்சிக்கு சன் தொலைக்காட்சி நிறைய செய்திருக்கலாம்.சன் குழு செய்யத் தவறியதையும்,மொழிச்சிதைவுக்குப் பங்காற்றியதையும் பங்குச் சண்டை காரணமாகத் தோன்றிய கலைஞர் தொலைக்காட்சியாவது செய்ய முயற்சி செய்திருக்கலாம்.பட்டும் புத்தி வரவில்லை என்பதை ரசிகன் போன்ற சுயசொறிதல் புது நிகழ்ச்சிகளே பறைசாற்றுகின்றன. இந்தப்பாட்டு எனக்குப் போடுங்கன்னு தொலைபேசியில் விருப்பமான பாடல் கேட்பவர்கள் கலைஞருக்கு மயக்கமா?கலக்கமா?மனதிலே குழப்பமா பாடலை அர்ப்பணம் செய்யலாம்.

தேவைப்பட்டால் இந்தி கற்றுக்கொள்ளலாம்.கழுகு தளத்தில் சவுக்கின் இந்தி குறித்து பின்னூட்டத்தில் சொன்னது போல் வரலாறு மட்டுமே படித்து விட்டு சிவசங்கர மேனன் போன்றவர்கள் UPSC பரிட்சை மற்றும் பின்புலம் காரணமாக தமிழர்களுக்கு எதிரான நிலைப்பாட்டை எடுக்கும் சூழல்களை தடுப்பதற்கு இந்தி கற்றுக்கொள்ள வேண்டியது அவசியம் என்பதால் Learning hindi should be a selective method but not a collective method.அதாவது அவரவர் தேவையின் அவசியம் கருதி இந்தி கற்றுக்கொள்ள வேண்டுமே ஒழிய ஒரு சிலரின் தேவைக்காக அனைவரும் இந்தி கற்றுக்கொள்வோம் கொள்கை தவறானது.சிவசங்கரன் மேனன் போன்ற பதவியில் இருப்பவர்கள் கூட பதவியின் பொருட்டு சிங்களம் கற்றுக்கொள்ள இலங்கை அனுப்பி வைக்கப்பட்டவர்களே.மேனன் சிங்களம் கற்றுக்கொண்டாரா என்பதை யாராவது கேட்டுச்சொல்லுங்கள்.

முன்பை விட இப்பொழுது தமிழ் மொழி காக்கும் தேவை இன்னும் அதிகமாகவே இருக்கிறது.இதனை இன்னுமொரு தலைமுறைக்கும் விட்டுச் செல்வோம்.மும்மொழித் திட்டத்தை தொடர்ந்து தமிழகத்தில் புறக்கணிப்போம்.