அருணாச்சலம் முருகானந்தம்!

டிஸ்கி : இந்த பதிவு பதினெட்டுக்கும் மேல்  என்ற முத்திரைக்குரியதா அல்லது சமூக அக்கறை முத்திரைக்குரியதா என்பது அவரவருக்கான கருத்துரிமை சொந்தமானது.

சில நல்ல மனிதர்களும்,செய்திகளும் வெளியுலகுக்கு அதிகம் விளம்பரம் இல்லாமல் போய் விடுகிறார்கள்.அந்த வரிசையில் சமூக அக்கறையோடு எந்த ஆணுமே செய்ய இயலாத அரிய சாதனையாளர் பட்டியலில் அருணாச்சலம் முருகானந்தம் அவர்களை குறிப்பிட்டாக வேண்டும்.

இப்பொழுது சானிடரி நாப்கின் பற்றிய விளம்பரங்களும்,விழிப்புணர்ச்சியும் நகர்ப்புறங்களிலும்,படித்த பெண்களிடையே பரவியிருக்கிறது.முந்தைய காலத்தை நோக்கினால் பெண்களுக்கோ வீட்டுக்கு தூரமாக உட்கார்ந்திருப்பது மற்றும் பழைய துணிகள் போன்ற அனுபவங்களே.முருகானந்தம் கல்யாணமான புதிதில் அவரது மனைவிக்கு உதவி செய்ய வேண்டுமென்ற நோக்கிலும் சானிடரி நாப்கின் செலவு அடிப்படை பொருளாதாரத்தோடு இணைந்த ஒன்று என்ற சிந்தனையில் உருவாகிறது மதர் கேர் சானிடரி நாப்கின் ஆராய்ச்சி முயற்சி. சானிடரி நாப்கின்கள் பெரும் முதலீட்டில் பெரும் இயந்திரங்களைக் கொண்டு இயங்கும் ஒரு கார்பரேட் வியாபாரம்.இதனை சிறு தொழிலாக கிராமத்துப் பெண்களும் செய்ய இயலுமா என்ற ஆராய்ச்சி,முயற்சியில் சிறிய அளவிலான வீட்டிலேயே இருந்து கொண்டு இயக்கும் வடிவத்திலான இயந்திரத்தை உருவாக்குகிறார் முருகானந்தம்.

ஆராய்ச்சியின் முதற் கட்டமாக நாப்கின் உருவாக்கியாச்சு.இதனைப் பரிட்சித்துப் பார்க்க அவரது மனைவி,சகோதரிகள்,மருத்துவக்கல்லூரி மாணவிகள் என்று முயற்சி செய்தும் வெற்றி பெற முடியவில்லை. நித்யானந்தா, பிரம்மானந்தாக்களுக்கு படை சூழ பெண்கள் வரும் போது தனது முயற்சிக்கு ஒரு பெண்ணுமே வாலண்டியராக விரும்பவில்லையென நகைக்கிறார். இறுதியில் தானே ஒரு சிறிய கால் பந்தில் ஆட்டு ரத்தம் செலுத்தி அதனை அழுத்தினால் சானிடரி நாப்கின்னுக்கு ஆட்டு ரத்தம் வந்து விழுகிற மாதிரி செய்த பரிசோதனை அந்த மூன்று நாட்கள் எவ்வளவு சிரமத்துக்குள்ளானவை என்ற பெண்கள் மீதான மரியாதையை அனுபவமாகத் தந்தது என்கிறார் அருணாச்சலம் முருகானந்தம்.நிலவில் கால் வைத்த ஆர்ம்ஸ்டாரங்க் மாதிரி இடுப்பில் சானிடரி நாப்கினை கட்டிக்கொண்டு பரிசோதனை செய்த முதல் மனிதன் தானாகத்தானிருக்கும் என்கிறார் முருகானந்தம்.

கோடிகளில் புரளும் கோடிஸ்வரர்கள் இறுதியில் பொதுசேவை,நன்கொடை என்ற இறுதி நிலைக்கு வந்து விடுவதன் காரணம் வாழ்வின் முக்கால் பகுதி காலத்தில் பணத்தை தனது முன் பாக்கெட்டில் வைத்துக்கொள்வதால்தான்.எனவேதான் தான் பணத்தை பின்பக்கத்தில் வைத்துக்கொள்வதாகவும்,தனது ஆராய்ச்சியின் வெற்றியை பெரும் நிறுவனத்துக்கு தாரை வார்க்காமல் கிராமத்துப் பெண்கள் சுயதொழில் முயற்சியில் வெற்றி பெறவேண்டும் என்ற ஒற்றை நோக்கத்துடன் மட்டுமே மதர் கேர் சானிடரி நாப்கின் சிறுதொழிலை ஊக்குவிப்பதாக கூறுகிறார் முருகானந்தம்.

சித்ரா ஜெயராம் என்பவர் அருணாச்சலம் முருகானந்தம் பெரும் முயற்சிக்கு ஆதரவாக குறும்படம் ஒன்றை தயாரித்துள்ளார். Rags to Pad என்ற இந்தப் படம் குறும்பட தயாரிப்பு போட்டியில் அரையிறுதி  வரை வந்துள்ளது.

பதிவுக்கான உதவி TED and vimeo.